No.601/2021-2022

Aizawl, 20th May, 2021 : Special Secretary to the Government of Mizoram, Health & Family Welfare Department Pu R. Lalramnghaka chuan May ni 19, 2021 khan a hnuaia tarlan ang hian thupek a chhuah :

Covid-19 kaihhnawiha Home Quarantine phalsakte tana hman tur ‘Inkaihhruaina (Guidelines)’ No.D.33011/25/2020-HFW(nCOV)/Sat(B) dt.31.10.2020 a chhuah chu a hnuaia mi ang hian tih danglam (revised) a ni a. He Notification hi chhuah a nih atanga thu leh awm hma chu hman tur a ni.

HOME QUARANTINE TURTE INKAIHHRUAINA (GUIDELINES)

Mizoram pawn atanga Mizorama lo lut, mPASS kaltlanga Home Quarantine phalsak tawhte chuan hengte hi an zawm tur a ni -

1. Home quarantine turte chuan room hrang leh inthiarna room hrang an nei tur a ni a. Hetiang neite chu an chhungte inkhunghran a ngai ve lo ang. An bungrua leh thawmhnawte an chhungte’n an khawih pui tur a ni lo.

Hetiang room hrang neilote chu home quarantine an dil anga phalsak an nih chuan an chhungkuain an inkhung tur a ni a, test an tul anih chuan test man pawh an mahniin an chawi vek tur a ni ang.

2. Home quarantine phalna nei, symptoms neilote chu an thlen veleh (on arrival) Lengpui airport leh Screening point dangah Rapid Antigen Test (RAgT) hmangin Covid-19 test tihsak an ni ang a, negative te chu Home quarantine phalsak an ni ang.

3. Quarantine-a an awm chhung hian Health Department-in Home Quarantine inkaihhruaina a siamte chu tha taka zawm tur a ni. Mahnia room-a inkhung, Mask vuah, kutsil ngun, hand sanitizer hman, social distancing leh invenna dangte quarantine chhung hian uluk takin an vawng tur a ni.

4. mCOVID-19 leh Aarogya setu app ah in register vek tur a ni.

5. Home Quarantine chhung hian quarantine tan ni atanga ni 10 hnuah
RT-PCR test tur a ni a, test result chhuah hma chuan uluk takin an in quarantine chhunzawm ngei tur a ni.

6. Test result a chhuah a, a negative chuan inkhung zui a ngai tawh lo ang a, mahni hriselnain chik (self monitoring) chungin ni 7 chhung an in en zui ang.

7. Test positive te chu sorkar inkaihhruaina angin Covid kaite enkawlnaah an awm ang.


8. Home Quarantine laiin bialtu Chief Medical Officer (CMO) leh Local/Village Level Task Force te’n an vil zui ang a, quarantine zo tawhte chu Local/Village Level Task Force te’n Quarantine Completion Certificate an siam sak thin ang.

9. Mi tupawh Home Quarantine laia Covid-19 signs & symptoms nei erawh chu ni 10 nghak kher lovin, Task Force/CMO/DCHC/ Helpline/ ZMC a rang thei ang bera hrilh a, swab sample laksak tur a ni.

10. Hriselna lama harsatna neite tan heng Covid Helpline ah hian thu a thlen theih reng a ni – Phone nos – 102 / 0389-2323336 / 0389 2322336 / 0389 2318336.