No.3960/2020-2021  

Vawiin tlai (09.08.2020) khan Health & Family Welfare Minister Dr. R. Lalthangliana hovin tun hnaia COVID-19 vei an pun tak thut avangin Emergency Meeting, SAD Conference Hall-ah neih a ni.


Meeting-ah hian Mizoram University hnuaia Under Graduate leh Post Graduate exam tur te chu exam nei hrih lo (postpone) turin Disaster Management & Rehabilitation Department atanga thurawn (advisory) pek ni se tih rel a ni a. Nitin mamawh phurtu truck drivers bakah ram pawn atanga thlawhna a lo lut nitin mi (passengers) 60 atanga 70 leh lirtheia Vairengte paltlang (by road) a lo lut mi (passengers) 50 an awm tih ngaihthlak a ni a, Mizoram-ah COVID-19 positive a pun tak hluai avangin nitin a lo lut te (entry of passengers) hi awmze neia khuahkhirh tulin an hria a, a tul anga hmalak ni se tih a  ni.  Rapid Antigen Test Kit singkhat lei belh tur a hmalak ni se tih remtih a ni bawk a. Vairengte-ah Doctor leh Lab Technician paruk dah belh nghal tura rel a ni bawk a. Zoram Medical College, Falkawn hi COVID-19 veite enkawlna tur bika ruahman a nihna angin, COVID-19 vei nilo chu damlo dang tumah admit tawhloh tura rel a ni. Khawtuala inkaidarh lo awm palh ta se, hemi atana inbuatsaihna, a bikin a hma tawnga thawkte (frontline workers) tan hmalak dantur  ruahmanna (Contingency plan) neih ni se tih rel a ni bawk. Swab Sample result nghak tan inkaihhruaina (SOP) siam ni se tih remtih tlan a ni. 


Mitthi vuina programme-a mipui kalkhawm zingah contact tracing tih ngai awm ta se, harsatna a awm theih dawn avangin, chhiatni thatni inkaihhruaina chungchangah YMA hruaitute leh Kohhran hruaitute nen inrawn tlan that leh ni se tih a ni. Gymnasium leh Sports Complex te khar leh tura hmalak ni se tih remtih a ni.


He meeting-ah hian Information and Public Relations Minister Pu Lalruatkima chuan Cabinet Meeting-in a lo rel tawh anga Minister pahnih Pu Lalchhandama Ralte leh Pu TJ Lalnuntluanga te nen  nimin lama National Highway 306 siamthat mek avanga lirthei tangkhang te, a khalhtute zinga COVID-19 kai hmuhchuah chungchangah, a hmuna an tlawh bakah Kolasib leh Vairengte Check Gate thleng an thlawh nghal thu a sawi a. Tun dinhmunah nitin mamawh (esstential commodities) a bikin buhfai dinhmun a tha tih a sawiin Vairengte Screening Point a hmalakna chak leh zuala kalpui a nih theihnan ruahmanna an siampui tih a sawi a. COVID-19 hripui leng chungchangah kan hmabak sawithiam har hle mah se sawrkarin theihtawp chhuahin hma a la a, mipui te pawh sawrkar hmalakna ring ngam a chi-ai lo tur leh mahni awmna hmun theuhah fimkhur turin a chah a ni.


Chief Secretary Pu Lalnunmawia Chuaungo chuan Independence Day, 2020 lawmna-ah National Anthem, Guard of Honour lak leh Chief   Minister thuchah a awm dawn tih a sawi a, tunlai boruak avanga kan himnan kum dang anglo in mipui leh zirlai sawm an ni lo tih a sawi a, parade a awm dawnloh thu leh Governor’s at home programme a awm dawnloh thu a sawi bawk.


Meeting-ah hian sawrkar mi leh sa pawimawh te an tel a ni. 

Attachment

  • Loading attachment...