New Delhi-a cham mek Health & Family Welfare Minister Dr. R. Lalthangliana chuan nimin ni 24th September, 2019 khan Ayush Union Minister Pu Shripad Yesso Naik leh Ayush Ministry-a senior official-te hmuin Ayush hi Mizoram-ah awmze nei zawk leh liantham deuha kalpui atan - ‘Proposal for Strengthening of Ayush Development in Mizoram Project’ - chu lian tham taka hmalak theihna turin a hnuaia mi ang hian Ayush Minister leh senior official-te a sawipui a ni :

1. National Ayush Mission hnuaiah Ayush doctor 40 post ruak hnawhkhah theihna tur atana ruahmanna te,
2. Staff quarter sakna tur te,
3. Central medical store dinna tur leh district level medical storage unit dinna tur atan te,
4. Solar power plant installation IAH Thenzawl leh hmun danga dah tur te,
5. Solar power plant CHC leh PHC a dah tura ruahmanna te,
6. ASU&H DTL tih hmasawnna tur te,
7. PHC 57(sawmnga pasarih) a Herbal Garden dinna tur te,
8. Ayush hospital liantham Mizoram a dinna tur te,
9. Aloevera cultivation leh processing plant Mizoram-a dinna tur, a vaiin Rs. 63.00 crore zet ruahmanna te Health Minister hian a thehlut a. Union Ayush Minister pawhin a ngai pawimawh hle a, theihtawp chhuaha tihhlawhtlin a tum thu a lo hrilh a ni.

Nimin vek khan H&FW Union Secretary Pi Preeti Sudan leh Ministry official pawimawh tak takte nen inhmuin heng a hnuaia mi a sawipui:

1. February ni 27,2019-a RIPANS tihchangtlunna tur atan a Rs.480 crore zet central sorkar atanga ruahmanna peihfel ni tawh si vawiin ni thlenga hma lak chak tawk loh chungchanga hma la chak turin a sawipui.
2. Zoram Medical College in a mamawh em em boys/girls hostel sakna tur atan ruahmanna a rang lama siam a tul thu te;
3. Mental Health Hospital (Institute of Human Behavioural & Allied Sciences), Mizoram a din a tul thu leh heta tana project felfai tak siam peih anih tawh thu te leh Mizoram chhunga district hospitals hrang hrang kan neihte tihchangtlunna tur atana ruahmanna kan neih te a sawipui a. He mental health hospital dinna tur atan hian Rs. 40 crore zet ruahmanna siam ani a. Hemi chungchang hi DoNER ah thehluh anih dawn thu leh Health Minister leh a senior officials lam pawhin Ministry of DoNER lama an theihtawp a nawrpui an intiam thu an lo hrilh.

Heng bakah hian Dr. R.Lalthangliana hian Delhi-a Mizoram sorkarin  empanelled hospital a neihte zinga 4(pali) heng : Indraprastha Apollo Hospital, Fortis Escort Heart Insititute, Indian Spinal Injuries Centre, Max Super Specialty Hospital te tlawhin, hospital thuneitu sang, an Chairman, CEO leh Director te hmuin, heng a hnuaia mite hi a sawipui pawimawh zualte a ni:

1) Mizoram  atanga damlo kalte tawng harsat tak tak te, mi rethei harsa tak an damdawiin rawn pan te lo ngaihsak tur te;
2) Mizoram State sorkar in health care scheme thar 1st October, 2019 a hman tan tur a tha taka lo dawngsawng tur te leh PMJAY scheme pawh uluk taka hmang tur te;
3) Heng hospital doctor thiamna bik nei: Cardiologist, Neurologist leh cancer lam enkawl thiam bikte a khat tawka Mizoram-a medical camp ni hnih/khat tal rawn neih sak thin turin.
4) Mizoram atanga doctor ten short term training (thla 1-2) heng: Cardiology, Neurology, palliative treatment – basic kimchang training pek theih dan tur, sum seng lova tih theih dan tur te a sawipui.
5) Heng Mizoram pawn, Delhi chauh nilo - Kolkata, Gauhati, CMC Vellore, Tata Cancer Institute, Mumbai-a Mizoram sorkara empanelled hospitals hote nena modern technology (internet) hmanga inthlun zawm vek a, rang tak leh samkhai zawka hna thawh ho theih dan tur kawng ruahmanna tul a tih thu te a sawipui a.
6) India ram khawpui a Resident Commissioner/Addl.Resident Commissioner te hi Mizoram State aiawh an nihna anga hospital lamin Mizoram aiawh an nihna lo hriatpui a, damlo an buaipuina kawngah awlsam leh buaina tawk lova an tih theihna tur atana Special Entry Card siamsak turin a ngen bawk a ni.

Health Minister Dr.R.Lalthangliana hi official meeting leh empanelled hospital te a tlawhna hmun hrang hrangah hian Resident Commissioner leh Addl.Resident Commissioner, Mizoram House, New Delhi leh Mizoram sorkara Health Deptt. official ten an tawiawm a ni.