National Action Plan for Drug Demand Reduction (NAPDDR) hnuaia Mizoram Drug Demand Reduction programme kalpuina a Re-orientation programme for key resource persons on drug demand reduction chu September ni 24 atanga September ni 27 chhung hian Directorate of SCERT Seminar Room ah neih a ni dawn a, vawiin khan a hawnna programme neih a ni. He huna resource person tura koh te hi Mizoram District hrang hrang atanga DIET lecturer thlan chhuah te an ni.

SCERT Director Pi Laldawngliani Chawngthu chuan zirna in a ruihhlo ti lo tura naupangte hnena zirtirna pek pawimawhna leh National Action Plan for Drug Demand Reduction (NAPDDR) chungchang a sawifiah a. District tin atanga resource person te hnen atangin an hmalakna hrang hrangte a sawihopui nghal bawk.

Ni 4 awh tur training-ah hian thupui pawimawh tak tak ruihhlo laka invenna awm thei te leh a enkawlna te, ruihhlo hman sualin tleirawlte a nghawng a neih pawi theih dan te, tleirawl te tan ruihhlo tih mai a awlsam chhan te, tleirawlten an hmalam hun thlir thiam chunga hlawhtlinna kawng an zawh thiam theihna tur te, ruihhlo tih chhinin ngawlveinaah a hruai lut thei tih te, thiante nawrna thalo hnar thiam te, rilru hriselna leh ruihhlo inkungkaih dan te, tunlai khawvel hmachhawn thiam thei tura nun dan thiam (life skills) leh rilru hnualna leh ngaihtuahna thalo hmachhawn thiam dan te a tel an zir dawn a ni.