Health & family Welfare Minister Dr. R. Lalthangliana chuan vawiin chawhnu dar 1:00 khan hrilhlawk lovin Aizawl Civil Hospital Out-Patient Department (OPD) leh Blood Bank te a tlawh thut (surprise visit) a, Minister chuan hetianga a tlawh chhan hi tunhnaia Sawrkar enkawl damdawi in hrang hranga OPD inentir hun leh inentir dan tur thu pek chhuah thar chu mipuiten an chhawr tangkai em tih a taka hriat a duh vang a nih thu sawiin damdawi in OPD a duty te pawhin an hna an thawk tha hle a a hriatthu leh mipuite pawhin an awlsam phah tih a mit ngeia a hmuhin OPD a duty daktawr, nurse leh thawktu zawng zawng chungah lawmthu a sawi a ni.

Health & Family Department chuan tunhnai khan thuchhuah siamin Sawrkar enkawl District Hospital zawng zawng bakah State Referral Hospital, falkawn, Kulikawn Hospital leh Mizoram State Cancer Institute, Zemabawk ah te OPD hi thlatin inrinni vawihnihna tih loh ah chuan hawn vek tawh tur a ni a, OPD card hi zing dar 9:00 atanga chawhnu dar 1:00 thleng lakchhuah theih a ni a. OPD card hi a hlui leh a thar registration number nei tawh reng reng chu hnawl (reject) phal a nilo a ni.

OPD a tlawh hnu hian Minister hian Aizawl Civil Hospital Blood Bank chipchiar takin a fang leh a, Blood Bank kaihhnawih department hrang hrang te pawh fangin hnathawh kalpui a nih dan a en nghal a, Minister chuan blood bank a thawktute an fakawm a tih thu sawiin indaihlo chung chung pawh a phunnawi lova an thawh thin avangin lawmthu a hrilh bawk. Minister chuan thawktute indaihlohna pawh a hriat thu sawiin an indaihlohna phuhru turin hma lak mek a nih thu a sawi bawk a ni.