Alzheimer's & Related Disorders Society of India (ARDSI) Mizoram Chapter leh National Mental Health Programme (NMHP) tangkawp buatsaihin vawiin khan Chanmari Veng YMA Hall-ah World Alzheimer's Day hman a ni a, Health & Family Welfare Minister Dr. R.Lalthangliana'n khuallian niin a hmanpui.

He hun hmanpuitu khuallian Dr. R. Lalthangliana chuan mipui kalkhawm hmaah thu sawiin khawvel hmasawnna a thang zel a, kan zinga natna awm reng thin kan hriatchian loh vanga enkawl ngaihna kan hriatloh leh kan hmelhriatlohte pawh a nihna tak kan hrechiang thei tawh a, hriatthiamna nen awmze nei zawkin kan inenkawl thei ta a ni a ti a.  Natna chi hrang hrang vei zingah thluak sawng natna "Alzheimer's" veitute hi enkawl a hautak bik em em a, an natna an inhre silo a kum upa lam an ni tawh bawk tlangpui nen, duat leh hmangaih taka dawhthei taka enkawl an ngai thin a, an natna hmuhchhuah leh anmahni enkawl dan tur inzirtirna hi uar lehzuala neih a tul a, mi tamtakin he natna hi kan la hriatthiamloh avangin natna dang emaw tih vangin buaina namenlo kan tawk thin a ni a ti. Mizoramah Mental Health Hospital tha tak a hranpa liau liau a kan neih a tul a, hawizau deuh hlek a hetiang hospital din dan tur hi bengsika kan ngaihtuah a ngai a ni a ti a. ARDSI:Mizoram Chapter hmalakna leh Alzheimer's natna veitute enkawl kawnga hmalakna tanpuina atan Rs nuaih khat a thawh tur thu a sawi bawk a ni.

ARDSI hi Alzheimer's & Related Disorders Society of India (ARDSI) tihna a ni a, India rama Alzheimer's leh an anpui natna ngaihventu pawl lian zawkte nena inthlunzawm a ni a, September ni 21, 2015 khan ARDSI Mizoram Chapter hi Aizawlah din a ni a. ARDSI pawlin a tum chu Alzheimer's natna veitute ngaihven leh a enkawltute kaihhruai, zirtir, inhriatpawhtir leh khawtlanga inthlahrung lova awmtir a ni.

ARDSI Mizoram Chapter hian World Alzheimer's Day (September ni 21) ah Hriatrengna Kawngzawh (Memory Walk) a buatsaih thin a, natna leh enkawlna chungchang sawihona leh inzirtirna a buatsaih thin bawk. Social media hmanga inkawmna group siam a ni a, Electric Veng, Aizawlah office-cum-counselling centre an nei bawk a ni.

ARDSI Mizoram Chapter ah hian a duh apiang tan member nih theih a ni a, Annual membership fee Rs. 100/- leh Life membership fee Rs. 1000/- a ni. Member ni tur hian Alzheimer's natna vei chhungkua ami nih kher a ngai lova, Alzheimer's leh a anpui natna avanga harsatna tawktu leh ngaihventu apiangte tan member nih theih a ni.

Mizoram sawrkara Health & Family Welfare Department hnuaia National Mental Health Programme chuan kum 2018 atangin ARDSI Mizoram Chapter hi hmangin Helpline Counsellor a ruai a, Alzheimer's bakah, rilru lama harsatna neite leh an chhungte tan Helpline Counsellor-te heng mobile phone number - 9366181946/9366191341/9366193094 ah te biakpawh theih reng a ni.

Vawiin World Alzheimer's Day puala hun buatsaih hi Dr. Daniel Chianghnuna, EC, ARDSI:Mizoram Chapter-in a kaihruai a, Pu Vanneihtluanga, President, ARDSI:Mizoram Chapter-in inlawmna thu a sawi a, Prof. HK Laldinpuii Fente, Secretary, ARDSI:Mizoram Chapter-in pawl hmalakna report a pe a, kum kalta chhunga  Alzheimer's natna avanga an member boral mi 7 sunna hun hman a ni a. Alzheimer's natna veite enkawl kawnga intiamtharna hun hman a ni bawk.

Chawhnu lamah Alzheimer's natna leh a kaihhnawih thil pawimawh tak tak zirhona hun buatsaih a ni a, he hun hi Dr. Robert L. Khawlhring, SNO, NMHP, Mizoram leh Pu Lalbiaksangi Jt. Secretary,ARDSI:Mizoram Chapter ten he hun hi kaihruaiin mithiam sawm bik ten topic hrang hrang insemin zirtirna an pe a ni.

Alzheimer's natna hi Mizo tawngin 'Thluak Sàwng natna' tih a ni a, thluak a chhiat zel avanga ngaihtuahna mangna bakah, hriatrengna, nungchang leh nihna thlenga hloh a hniam lam pantir zeltu natna a ni. Tihdam har tak la ni rih
mahse enkawl, tihmuan leh tihhahdam theih a ni. A anpui thluak natna dang a tam avangin, Alzheimer's Disease a ni ngei em tih finfiah tur leh enkawl dan tur hre tura doctor leh mithiamte rawn a pawimawh thu ARDSI hotuten an sawi a ni.

Govt. Aizawl West College, Govy. Hrangbana College, Pachhunga University College, Mizoram College of Nursing, Mizoram University (Dept of Clinical Psychology Deparent), leh Mizoram University (Psychology Department) zirlaiten he hun hi an chhim a ni.