2282/2024-2025

Aizawl, the 28th September, 2024: Khawvel hmun dangte rualin vawiin khan World Rabies Day, 2024 pualin Health & Family Welfare Minister Pi Lalrinpuii hovin Hotel Royale Lalawi, Khatla, Aizawlah 'Breaking Rabies Boundaries' tih thupui hmangin hun hman a ni. He hunah hian kum 2030 ral hma ngeia ui a hri umbo tura hmalakna 'State Action Plan for Rabies Elimination (SAPRE)' chu khuallian Health Minister-in a tlangzarh nghal a; heti hian Mizoram, Tamil Nadu leh Meghalaya-te chu India rama State Action Plan for Rabies Elimination tlangzarh hmasa ber an ni.

Khuallian Pi Lalrinpuii chuan State Action Plan for Rabies Elimination (SAPRE) tlangzarh a ni ta chu lawmawm a tih thu sawiin, hei hian State chhunga rabies umbona kawnga hmalakna a tihchak lehzual ngei a beisei thu a sawi a. Mizote chu ran ngaina tak kan nih thu leh khawtlang nunphung, eizawnna leh nitin khawsaknaah rante'n hmun pawimawh tak an chan thu sawiin, "Ram hmasawn zelah Mizoramah ngei pawh ui breed hrang hrang a awm zel a, chhungkaw member ang hiala kan ngaih ni mah se, pawnlam mite tana hlauhawm leh harsatna thlentu an nih loh nan a enkawl zui kawngah pawh tanrual a ngai a, abikin ui huaisar leh kawlhte kan ven uluk a ngai hle a ni, a ti a. Damdawiin hrang hrangah seh avanga hridanna la tam tak an awm thu sawiin, ui a seh avangin khawvel pumah kumtin mi 56000 chuangin an thihpui thin thu leh, India ramah pawh kum tin mi 20000 chuangin an thihpui thin thu a sawi bawk. 

Health Minister chuan World Health Organisation hmalakna 'One Health' concept chu nasa lehzuala kalpui leh inhrilhhriat tam a pawimawh thu sawiin, WHO, FAO leh OIE te'n kum 2030 ral hma ngeia ui seh atanga natna kai avanga thihna thleng thei tihreh tuma hmalakna an nei chu tha a tih thu leh, hemi tihlawhtling tur hian NHM hnuaiah National Rabies Control Programme (NRCP) chak taka kalpui a ni chu lawmawm a tih thu a sawi a. Rabies control programme hnuaia Health Department leh Vety. Department-te thawhdunna fakawm a tih thu sawiin, ui seh atanga natna kai avanga mihring thihna thleng thin umbo turin hemi kaihhnawih Sawrkar Department leh NGO hrang hrangte inkarah thawhhona tha tak a awm zel a beisei thu a sawi bawk.

Thusawitu dang Dr. C. Zarzokima, Addl. Director (AH&DD), AH&Vety. Department chuan AH & Vety. Department-in kum engemawchen kalta atangin World Rabies Day a lo hman tawh thu leh ui a hri umbo tura theihtawp chhuaha hmalak a lo nih tawh dante a tarlang a. One Health Concept hnuaiah Health & Family Welfare Department nena tangduna ui a hri umbo tura hmalakna tur 'State Action Plan for Rabies Elimination (SAPRE)' tlangzarh a ni chu AH& Vety. Department chuan phurawm a tih thu a sawi bawk. 

He hun hi Dr. Eric Zomawia, Mission Director, National Health Mission (NHM) chuan kaihruaiin kalkhawmte lawmna thu a sawi a. Dr. Vanlalrengpuia Chinzah, State Nodal Officer, NRCP hnen atangin National Rabies Control Programme (NRCP) chungchang ngaihthlak a ni a. Dr. Rebecca Lalmuanpuii, State Veterinary Consultant, Integrated Disease Surveillance Programme (IDSP) in lawmthu sawiin hun hman a khar a ni.

He hunah hian Health & Family Welfare Department, AH&Vety. Department, UNDP leh Jhpiego hnuaia thawktute bakah ran vulh kaihhnawih NGO aiawhte an tel a ni.