2281/2024-2025

2024 Mimkut thla ni 28: September ni 17 aṭanga October ni 2, 2024 inkar chhunga Swachhata Hi Seva 2024 hnuaia faina beihpui thlak kalpui mek leh September ni 25 aṭanga October ni 2, 2024 chhunga Faina Hapta kalpui mek pualin kar hmasa leh tun kar chho khan Lunglei District chhunga sawrkar office hrang hrangte chuan an remchan danin an office chhung leh a chhehvel tihfai hnatlang an thawk hlawm.

Swachhata Hi Seva 2024 Lunglei District Steering Committee chuan September ni 23, 2024 (Thawhṭanni) kha sawrkar office-te tan office leh a vel tihfai hnatlang thawh hun atan a ruahman a. Mizoram sawrkar General Administration Department chuan office-te'n Faina Hapta chhungin ni khat tal mahni office leh a vel tihfai hnatlang thawk tur leh Swachhata Hi Seva chhungin office-ah thuziak inang tlang (Swachhata banner) tar turin ruahmanna a siam bawk a. Hemi bawhzui hian Lunglei District-a office hrang hrangte chuan an office-ah faina thuziak an tar bakah, an remchan danin office leh a vel tihfai hnatlang hi an thawk hlawm a ni.
Faina beihpui thlak hian October ni 2, 2024 thleng a awh dawn a. October ni 2 khian Convention Centre, Lungleiah Lunglei District tana Swachhata Hi Seva leh Faina Hapta kharna hun chu buatsaih a ni ang.

Attachment

  • Loading attachment...