2713/2024-2025

Aizawl, the 28th October, 2024: Vawiin chawhma dar 10:00 khan Health & Family Welfare Minister Pi Lalrinpuii chuan a Office Chamber, MINECO-ah Health & Family Welfare Department hnuaia Food Safety lam hotute kovin mipuite a tana eitur hrisel leh thianghlim chhawpchhuah kawnga hmalak dan tur hrang hrangte a sawipui a. Mizoram mipui tlemte zingah natna hrang hrang nerve thalo atanga cancer thlenga vei kan tamin, natna thlentu zingah hian ei leh in hrisello leh thianghlimlo chu a chhan bulpui pakhat a nih tel avangin Health Minister Pi Lalrinpuii chuan food safety lamah nasa zawkin hmalak a tum a ni. 

Health Minister Pi Lalrinpuii chuan Mizoramin Food Testing Laboratory changtlung kan neih theih nan a hmun tur GAD-ah dilna a thlen tawh thu sawiin, a sakna tur sum pawh Sawrkar laipui lamah ngaihtuaha Testing laboratory tha leh changtlung neih theih nana theihtawp chhuah tlan a tul thu a sawi a. Thawktu lam indaihlohna pawh hemi kaihhnawih Sawrkar hotute sawipui thuai a tum thu sawiin, Mobile Food Testing VAN neih mek leh Testing Laboratory-a khawl neih ang angte pawh mipuite'n tangkai leh tha zawka an hman theih nana hma la turin thawktute a chah a ni.

He hunah hian Food Safety hotute chuan report pein, thawktu indaihlohna avang leh testing laboratory changtlung neih loh avangin nasa zawka hmalak a harsat thu Minister hnenah hian an thlen a. Tunhnaia FSSAI ranking-a Mizoram dinhmun hniam lutuk chhan pawh thawktu neih tlem avang leh chhan dang dang avangte a nih thu an sawi bawk.

Meeting-ah hian H&FW Department Principal Director Dr. Vanlalsawma, Joint Secretary Pi Lalnunmawii Ralte, Deputy Secretary Pu Vanlalchhuanawma Chawngthu te bakah Food Safety Designated Officer Pu F. Lalliantluanga leh Food Safety Officer-te an tel a ni.