2712/2024-2025

Saitual, the 28th October, 2024: Vawiin chawhma dar 11:00 khan DC Conference Room, Saitualah District Bawrhsap Dr. Lalngura Tlau kaihhruainain Saituala Children’s Day hman dan tur relin thutkhawmna neih a ni.   

He hunah hian Dr. Lalngura Tlau chuan Saitual district-in Children’s Day chu 2022 khan hlawhtling takin an lo hmang tawh tih a sawi a, department hrang hrang hmalaknain kumina an hmang leh thei tur chu lawmawm a tih thu a sawi. Bawrhsap chuan naupangte chuan intihhlimna hun an mamawh a ni, a ti a, he Children’s Day pawh hi “Naupangte ni” a nihna angin naupangten hlim taka infiamna hun an hman theih a beisei tih a sawi bawk. He ‘Naupangte ni’ hmang thei tura department hrang hrang thawhhona leh hmalakna chu lawmawm a ti a, District hmasawn zel nan tangruala thawhhona tha tak nei chhunzawm zel turin kalkhawmte chu a fuih a ni.  

He thutkhawmah hian Children’s Day chu Keifang Centenary Sports Complex-ah ni 29th November, 2024 hian hman rel a ni a, programme hman dan turte duan nghal a ni. He ni ah hian World Day for the Prevention of Child Abuse hman nghal tura rel a ni a, tlangau intihsiakna lawmman pawh sem nghal tur a ni. He Children's Day lawmnaah hian naupangte tan intihhlimna leh infiamna chi hrang hrang a awm dawn a ni.  

Vawiin thutkhawm hi District Bawrsap Dr. Lalngura chuan kaihruaiin, Pu James lalthangmawia, DCPO chu Secretary atan ruat a ni a. An ni bakah hian line department aiawhte, tlawmngai pawl aiawh leh Keifang Centenary Sports Complex Committee aiawh te an tel bawk a ni.