2100/2024-2025

Aizawl, the 17th September, 2024 : India rama Nursing lama thawk tha, National Florence Nightingale Awards 2024 chawimawina dawngtu mi 15 thlan chhuah zinga tel Pi H. Mankimi, Ward Superintendent (Rtd.), Serchhip IOC Veng lawmpuina hun chu vawiin chawhnu dar 2:00 khan Health & Family Welfare Department Minister Pi Lalrinpuii hovin a Pisa, MINECO-ah hman a ni.

Health & Family Welfare Minister Pi Lalrinpuii chuan nurse thawk tha chawimawina ngaihhlut hlawh tak National National Florence Award, Mizoram atanga dawngtu Pi H. Mankimi thinlung taka a lawmpui thu sawiin, a inpekna leh hnathawh ropui takte chu midangte'n entawn se a duh thu a sawi a. Nurse tha chherchhuah kawngah tanlak a pawimawh thu sawiin, nunna an kutah thui tak a innghah tlat avangin mawhphurhnate rinawm leh taima taka hlen chhuah zel a tul thu a sawi a. Mizoram health care tihmingmawitu pawimawh tak nurse-te chu damlo anmahni pantute tana dawr nuam leh hawihhawm nih tum turin a chah a ni.

Award dawngtu Pi H. Mankimi pawhin thu sawiin, Health & Family Welfare Minister-in lawmpuina a buatsaih avangin lawmthu a sawi a. A hnathawh chhunga nu leh naute dinhmun a ngaihpawimawh thin dante leh rinawm taka hna a thawh thin dante a tarlang a. Amah ang bawka nurse hna thawkte chu an rawngbawlna ngaipawimawh tur leh inpekna nena theihtawp chhuah thin turin a sawm a ni.

He hun hi Pi Sangchhin Chinzah, Secretary, H&FW Department chuan kaihruaiin Pi Lalchhanhimi, Jt. Director, Directorate of Nursing, H&FW Department-in National Florence Nightingale Award chungchang report tawi a pe a. Dr. Lalremmawii, DHS, H&FW Department-in hun hman a khar a ni.

Health & Family Welfare Department hnuaia din Selection Committee chuan kumin National Florence Nightingale Award atan hian Nurse 3-te a nominate a, an zing atang hian Pi H. Mankimi, Ward Superintendent (Rtd.) chuan he chawimawina ngaihhlut hlawh tak hi a dawng ta a ni. Nomination thehluh hun lai hian Pi H. Mankimi hi District Hospital Serchhipah Ward Superintendent hna thawk lai mek a ni.

Florence Nightingale Award hi kum1973 atang khan Ministry of Health & Family Welfare, Government of India chuan a pe tan a. Kum 1983 thleng khan chhunzawm niin hemi hun chhung hian Mizoram atangin mi 4 in an dawng hman a ni. Rokhawlhna avanga kum 20 chuang tawpsan a nih hnuah 2007 atang khan vawiin thlengin kum tin he chawimawina hi pek chhunzawm a ni a, Mizoram atangin mi 12 in an dawn belh ve leh a, tihian Mizoram atangin mi 16 te'n National Florence Nightingale Award hi an dawng tawh a ni.

Kumin 2024 hian India ram pumah nurse 15 te he award dawng tura thlan chhuah an ni a. Pi H. Mankimi hian he award a dawn chhan bulpui ber chu Maternal & Child (Nu leh Naute) nunna chhan nana a thawh hlawk vang a ni a. Nau neiha harsatna namen lo tawkte chhanchhuakin chung zinga langsar zual zingah chuan nu panga leh naute panga nunna a chhanchhuahte a tel a, heng bakah hian mahni inringtawk tura in-service training tha taka a kal thin avang leh a thiamnate a hman tangkai thinnate chu he chawimawina dawng thei tura thil pawimawh tak a ni tel bawk.

India President Pi Droupadi Murmu chuan September ni 11, 2024 khan a chenna Rashtrapati Bhavan-ah Nursing lama thawk tha mi 15 te hnenah National Florence Nightingale Awards 2024 chawimawina a hlan a. Mizoram atanga he chawimawina dawngtu Pi H. Mankimi hian kum 1986 khan GNM Durtlang Hospital atangin Nurse hna a zir zo a, Durtlang Hospital-ah kum thum a thawh hnuah September ni 7, 1991 khan Sawrkarah a lut a ni. March ni 5, 2023 khan Serchhip District Hospital-ah Ward Superintendent-ah a kaisang a, kumin March khan he hna atang hian superanuation pension-in a chhuak a ni.