2099/2024-2025

Siaha the 17th September 2024: Vawiin chawhma Dar 11 khan India Ram pum huap Faina beihpui thlakna ‘Swachhata Hi Seva’ hawnna chu District Bawrhsap Pisa tual zualah hman a ni a. SDO (S) leh UDPA hnuaia DAY-NULM DPO Pu Vanlalchhuanliana chuan he hun hi a kaihruai.

Addl DC Pu Abraham Beirazi Khithie chuan Swachhata Hi Seva puala hmalakna tur (activities) awm te a tarlang a, a hlawhtlinna chu mipui kutah a awm a, khawtlang a fai theih nan chuan inchhung khur a fai phawt a ngai tih a sawi. Swachhata Hi Seva campaign in a ngaih pawimawh zual pathum tarlangin Siaha khaw chhunga hnawm hnawk tam zualna (Cleanliness Target Unit) zawn chhuaha tihfai te, faina kawnga mipuite a tam thei ang bera an tel theihnana beihpui thlakte leh bawlhhlawh sawngbawl hna thawktu (sanitation workers) te tawiawm a, an hriselna ngaih pawimawh te a ni, a ti. Khawtlang a lo fai lehzual nan zirlaite an pawimawh hle a, an awm hmun atang theuha bultantu an nih a ngai a. Mi changkang leh mi hrisel ni tur chuan fai phawt a ngai tiin an nitin nunphungah faina ngai pawimawh zel turin a sawm.

Sr LAO, LAD, MADC Pi S Lalmuanpuii pawhin thu sawiin Swachhata Hi Seva Campaing chuan mi zawng zawng a huam a, Faina beihpui thlakna campaign chu hun reilote tana neih ni mahse faina nun vawng chhunzawm zelin mitin nuna lakluh a tul hle a ti a, kan mizia, kan nun phungah bet tlat se a duh thu a sawi. Zirna ah a ni emaw, kawng engkimah hlawhtling tur chuan hrisel a ngai a, hrisel tur chuan fai a pawimawh hmasa ber tih hre thar leh turin kalkhawmte a chah a, Faina chuan mahni ah inrintawkna (confidence) a pe ti bawkin mahni mai bakah in leh a vel thianghlim taka enkawltu nih tum theuh turin leh Siaha district a lo thianghlim a , a lo hrisel zel nan thawhho puiah a sawm nghal bawk.

Swachhata Hi Seva Hawnna inkhawm hi zero waste event a hman a ni a, Sanitation Officer, LAD, MADC Pu Henry PL Hnaihly chuan official-te leh zirlai kalkhawmte hnenah thutiam (Swachhata Pledge) lak tirna hun a hmang bawk.

Vawiin hawnna inkhawm denchhan hian zirlai naupangte leh official-te chuan DC Office atanga Siaha Traffic Point thlengin bawlhhlawh chhar faiin mipui hnenah faina ngai pawimawh turin an ngen nghal zel bawk a ni. Tarlan tawh angin Swachhata Hi Seva chu Sawrkar laipui ruahmanna niin faina beihpui thlakna a ni a, Mipui thinlunga faina tuha a awm theihna tura inzirtirna niin kar hnih chhunga kalpui tur a ni a, October Ni 2 2024 ah kharna  hun hman a ni leh dawn a ni.