2182/2024-2025

Aizawl, the 24th September, 2024: Ni hnih awh tur 'State Review Meeting on AB PM-JAY 2024' chu Health & Family Welfare Department hnuaia Mizoram State Health Care Society, State Health Agency ni bawk huaihawtin vawiin khan Dawrpui Multipurpose Hall, Aizawlah hman tan a ni a. He hun hi Health & Family Welfare Minister Pi Lalrinpuii chuan khuallian niin a hmanpui a, Pi Sangchhin Chinzah, IAS, Secretary, Health & Family Welfare Department chu khualzahawm niin, Health Department hnuaia Official te'n an tawiawm bawk. 

Ayushman Bharat Pradhan Mantri Jan Arogya Yojana (AB PM-JAY) hi September, 2018 atangin Mizoramah hman tan niin, chhungkaw khawsak harsa leh dinhmun hnuaihnung zawk thlanchhuah (Socio Economic Caste Census 2011 leh RSBY 2018) bakah Ration Card eng (yellow) leh pawl (blue) nei chhungkuate tana duan a ni a. He scheme hmang thei chhungkaw member tinin Ayushman Card/Golden Card an neih a ngai a, tun thlengin Mizoram chhungah Ayushman Card/Golden Card 5,65,428 siam a ni tawh a ni. Vawiin thlengin he scheme hi mipuite'n a thlawna damdawiina inenkawl nan tum 1,12,000 an hmang tawh a; heng inenkawlna senso atan hian sawrkar chuan Rs 1,23,45,86,300/- a hmang tawh a ni.

He hunah hian Dr. Biakthansangi, Chief Executive Officer, Mizoram State Health Care Society chuan AB PM-JAY zinkawng sawizauin, hlawhtlinna hrang hrang an neihte bakah harsatna hrang hrang an lo paltlang tawhte leh hmachhawp awmte a tarlang a. Health Care Scheme thar lo awm tur Mizoram Universal Health Care Scheme (MUHCS) kalphung tur inzirtirna hun neih a ni a. Dr. Vanlalsawma, Pricipal Director, Health & Family Welfare Department chuan lawmthu sawiin hun hman a khar a ni.

He hunah hian Mizoram chhunga AB PM-JAY hman kawnga Hospital leh mimal tithate chawimawina hun hman niin, Mizoram puma AB PM-JAY hnuaia District Hospital titha ber chu Civil Hospital Lunglei niin, lawmpuina certificate leh pawisafai Rs 1,00,000/- hlan an ni a. CHC/SDH category-ah Vairengte CHC chu titha ber niin lawmpuina certificate leh pawisafai Rs 70,000/- hlan an ni a. PHC category-ah Kawrtethawveng PHC chu titha ber niin lawmpuina certificate leh pawisafai Rs 50,000/- hlan an ni a; heng bakah hian District tina Arogya Mitra thawk tha thlan chhuahte hnenah chawimawina certificate leh pawisafai hlan a ni bawk.

He review meeting-ah hian District tina Senior Chief Medical Officer, Senior Medical Superintendent leh Medical Superintendent te'n an District chhung leh Hospital-a AB PM-JAY an kalpui dan tarlanna presentation an pe a. PHC, CHC leh Sub-District Hospital-a hemi kaihhnawih Medical Officer zawng zawng bakah Arogya Mitra leh Block Accounts Manager-te he meeting-ah hian an tel a ni.