1489/2024-2025

Aizawl, the 7th August, 2024: Health & Family Welfare Minister Pi Lalrinpuii chuan vawiin chawhnu khan Zoram Medical College (ZMC), din champhaphak vawi 6-na lawmna hun khuallian niin a hmanpui a, Crawford Gents' Hostel leh Hospital Management Information System (HMIS) a hawng nghal bawk. He hunah hian Aizawl South-III bialtu MLA Pi Baryl Vanneihsangi chu khualzahawm a ni.

Khuallian Pi Lalrinpuii chuan ZMC in a din champhaphak vawi 6-na tluang taka an thleng thei leh hemi ruala Crawford Gents' Hostel leh Hospital Management Information System hman theiha hawn a ni chu lawmawm a tih thu sawiin, hmasawnna hrang hrang thlen tura bultantu leh theihtawp chhuahtute fakawm a tih thu a sawi a. Sawrkarin health sector, a bikin primary health sector ngaipawimawhin thingtlang mipuite ban phak PHC hrang hranga Doctor indaihlohna phuhruk dan kawng a dap nasa tih sawiin, ZMC atanga pass chhuak zinga Doctor 39 te National Heath Mission hnuaia thawk tura lak nghal an ni, a ti a. Medical College tha nei turin hmunhma leh bungraw tha, zirtirtu fel leh rintlak bakah zirlai tha neih a pawimawh hmasak thu sawiin, ZMC ah Cardio-thorasic wing din turin State Sawrkar-ah rawtna thlen a nih thu leh IVF Centre neih theih nan ruahmanna siam mek a nih thu Pi Lalrinpuii chuan a tarlang bawk.

Health & Famliy Welfare Minister chuan ZMC infrastructure tihchangtlunna tur project Sawrkar laipuiah thlen a nih thu sawiin, PM Ayushman Bharat hnuaiah ICU, HDU, Isolation Ward, Dialysis Unit leh pawimawh dangte kengtel khum 50 awmna Critical Care Block dinna tur hmuh a nih thu leh chak taka hmalak mek a nih thu a sawi a. Health Minister chuan Medical Research lamah tanlak zual a tul thu leh Mizoram leh a chhunga chengte behchhan ngeia research neih a tul thu sawiin, mipuite'n hriselna tha zawk an neih theih nana ngaihtuahna seng turin ZMC a thawk Doctor thiam tak takte a sawm a. Zirlaite chu ram leh hnam innghahna la ni mai tur an nih avangin theihtawp chhuaha lehkha zir turin a fuih a; Medical science leh technology chhuak tharte chu inkawp tlat an nih avangin intuaithara thil chhuak tharte ngaihven zel turin a chah a. ZMC zirlaite chenna tur Crawford Gents' Hostel chu tangkai taka hman a nih theih nan duhsakna a hlan a, Hospital enkawlna kawnga hmalakna thar HMIS Nextgen eHospital chuan mipui leh hnathawktute tan awlsamna a thlen ngei a beisei thu a sawi bawk.

Khualzahawm Pi Baryl Vanneihsangi chuan Zoram Medical College-in kum 6 hmel an hmu chu a lawmpui thu sawiin, tun hun theng tura thathawhtute hmalakna chhuanawm a tih thu a sawi a, tawpsan mai lova hriselna kawnga hmasawn lehzualna a thlen ngei a beisei thu a sawi a. ZMC ah hmuh theiha hmasawnna hrang hrang a awm zel chu lawmawm tiin, ram mipui rawngbawlna a ni tih hriaa thahnemngai taka thawk chhunzawm turin thawktute a sawm a. HMIS chuan ZMC thawktute leh pantute tan awlsamna leh remchang a siam ngei a beisei thu a sawi a. Bialtu MLA a nih angin ZMC tan a tulna apiangah theihtawp chhuah a inhuam thu a sawi bawk.

Hemi puala Lecture Hall-4, Academic Block, ZMC a hun hmanah Pi Sangchhin Chinzah, IAS, Secretary, Health & Family Welfare Department & Chairman, Executive Committee, ZMC chuan kalkhawmte lawmna thu sawiin, Rev. J. Lalbiaknia, Chaplain, ZMC in hunserh a hmang a. ZMC chungchang report Dr. Jane R. Ralte, Registrar, ZMC, Crawford Gents' Hostel chungchang report Er. C. Lalenkawla, Sr. EE, PWD, Project Div-II leh HMIS chungchang report Dr. Eric Zomawia, Mission Director, NHM te hnen atangin ngaihthlak a ni. Zirlai tithate chawimawina hun hman ni bawkin Dr. John Zohmingthanga, Director, ZMC in lawmthu sawiin hun hman a khar a ni.

Crawford Gents' Hostel, Residential Hostel pahnih awmna hi NESIDS sum cheng vaibelchhe 10 senga sak a ni a, 24.10.2021 ah thawh tan niin, 24.10.2023 khan zawhfel a ni a. Contractor hi Ngurzamlova, Kolasib niin Mizoram PWD in architectural & structural design an siam a. Zopa chhiara chhawng 6 niin, floor area zau zawng belhkhawm hi square metre 2518.57 a ni a. Single room 10, double room 37 leh khum 84 a awm a ni.

Hospital Management Information System (HMIS) hi National Health Mission hnuaia ECRP-2 project kentel a ni a. Nextgen eHospital portal kaltlangin Damdawiin hmalaknate khawl hmanga kalpui computerised tur a ni a, he project hi Mizorama District Hospital 11 ah kalpui tum a ni. QR Code hmangin OPD/Casualty inziakluh bakah appointment book leh cancel a tih theih a. Hospital-a damlo inenkawlna kimchang taka record, bill siam, damdawi chawh, investigation result leh damlo record-te awlsam taka enlet theih tura dah theihna a ni a, Laboratory leh Radiology test tih hun tur leh indawt dante, result endik leh report theihna turte siam a nih bakah pawimawh dangte a kengtel a ni. ZMC a HMIS kalpui tur hian tun thlengin NHM sum cheng nuai 47 bawr vel sen tawh a ni.

ZMC hi August ni 7, 2018 ah hawn niin NMC in June ni 16, 2023 khan recognition a pe a. Khum 364 awm mekin tun dinhmunah zirlai 395, State chhung mi 288, State dang 48 leh NRI 59 an awm a. Faculty 112, Non Faculty Doctor 40 leh Non Teaching Staff 572 an awm mek a. Superspecialist leh Specialist hrang hrang Department 22 ah a awm a. Thisen Test chi hrang hrang, Ultrasound, CT Scan leh MRI te a tih theih a. Golden Card (AB-PMJAY), Health Care, ESIS, ECHS, RBSK, Dr. Ambedkar Scheme-ahte  Empanelled Hospital niin OPD Pharmacy-ah a thlawnin damdawi sem thin a ni.