1488/2024-2025

Dated Kolasib the 7th August 2024: Vawiin chawhnu khan Kolasib DC Conference Hall-ah Pu Robert C Lalhmangaiha,  Kolasib DC hovin National Highway chungchangah thutkhawmna neih a ni a, tun hnaia kawng chhe lutuk leh chak zawka thawm that dan tur chungchang ngaihtuah ho a ni.

Vawiin thutkhawmna kaihruaitu Pu Robert C Lalhmangaiha Kolasib DC chuan National Highway 306 chu Mizoram chak lakna ber leh kawng pawimawh ber pawl a nih thu sawiin Deputy Speaker & Kolasib Bialtu MLA ni bawk Pu Lalfamkima hovin tun hnaiah pawh an en ho tawh a ni, a ti a. Chumi bawhzuina kal zelah District level-a an tih theih chinah a tul ang ang ngaihtuaha hmalak dan tur buaipui ho tura thutkhawmna chu nei an nih thu a sawi a, kalkhawmte chu an ngaihtuahna ngunthluk taka seng a, sawiho turin a sawm a ni.

NHIDCL hotute leh Contractors lokal te pawh an harsatna te zawtin an kalpui tum dan te ngaihthlak a ni a. Contractor te tarlan danin pawisa an hmuh veleh theih tawp a hma an lak ve thu ngaihthlak a ni a. A tul anga culvert te siam niin hmun thenkhat ah Paver block-a an siam chu khawtlang mipuite ngenna angin concrete pavement a thlak a ni a, amaherawhchu a curing period ni 28 chhung nghah a ngaih avangin duhthusama hma lak theih a nih loh thu ngaihthlak a ni. NHIDCL pawh in ngenna siamin kawng sira phalna la hmasa loa approach road an lo siam thin chuan tui kawngpuiah a ti tlinga; chu chuan kawngpui a tihchhiat thin thu an sawi a. Quarry bula stone dust te , kawng sira vantlang mipuiten an hmanrua an dah thin te leh an kawtkaia side drain siam an duh lo thin te chuan an hnathawh a tih harsat hle thu ngaihthlak a ni.

Pu Robert C Lalhmangaiha chuan an harsatna te hriatthiamawm tamtak awm mahse mipuite mamawh em em thil pawimawh hmasa, a khuar zual lai hnawh te leh  tawhsual tawh theihna tur thawmthat zung zung a tul thu sawiin, VC te nena thawhhona tha neia an hun tiam chhunga zo fel tura tan an lak a ngai a ni, a ti. Tun atang chuan khauh zawka District Administration pawh in an nawr tur thu leh tanpui an ngaih pawhin an tanpui tur thu a sawi a, a tuar tu ber chu mipuite an ni a chuvang chuan mipuite tan kawng him leh hman tlak siam chu an tihmakmawh a ni, a ti. 

Kawngpui chungchanga thutkhawmna neih zawh hian nikum Fire Prevention Award Kolasib District in a dawn chu Kolasib DFO in DC hnenah hlanna hun a hmang nghal bawk a ni.

Vawiin thutkhawmna ahian DC bakah NHIDCL hotute leh Contractors te, Sr EE Kolasib, DFO Kolasib, Sub Hqs YMA Kolasib, Jt VC - Kolasib, Kawnpui, Vairengte, Bilkhawthlir te, Bualpui VCP, North Chhimluang, Thingdawl, Khamrang, Mualkhang VCP te leh Landowners  te an kalkhawm a ni.