Vawiin khan UD&PA Minister Pu Zodintluanga leh Health & Family Welfare Minister Pu Lal Thanzara hovin department officials te chu ATI Room No.2-ah thukhawmin UD&PA kaltlanga Smart City Mission, NEDP, NLCPR, NEC, NHM bakah Ministry of Culture hnuaia Health & Family Welfare atana hmalakna tur bikte an sawiho.

Vawiin meeting-ah hian Ministry of Culture-in Guru Gobind Singh leh Pt. Deen dayal Upadhyaya te piancham hriatreng nana ramchhung damdawiinte tihchangtlun nana project thehlut tura tih angin Mizoram state atang pawhin Falkawn, Tlabung, Serchhip, Mamit leh Kolasib damdawiin tihchangtlunna tur DPR thehluh nise tih rel a ni a. Aizawl Civil Hospital-a inzai turten awlsam zawka Operation Theatre an luh theih nan ‘ramp’ siam rawt a nih bakah District Headquarter tin Civil Hospital-ah CT Scan bun theih nise tih an rel bawk.

Smart City project hnuaiah hriselna kaihhnawih thil hrang hrang - trauma centre, emergency services leh damdawi in bungrua leh khawl mamawh te; NEDP hnuaiah Falkawn Referral Hospital & Medical College, District Hospital leh Cancer Hospital tihchangtlunna tur te; NEC tanpuinain Aizawl Civil Hospital-a MRI khawl bun, Cardiology leh Dental Department tihchangtlun leh Medical Library siam te; NLCPR hmangin Saiha leh Lawngtlai-ah District Hospital sak leh Mental Hospital din tum a ni a. Mizoram-in a mamawh em em damdawi in bawlhhlawh sawngbawlna ‘Bio-medical Waste Management’ kalpui tum a nih bakah UD&PA chuan hospital building cheithatna turin hma a la mek bawk a ni.