1656/2023-2024

Aizawl, the 25th August 2023 : Health Minister Dr. R. Lalthangliana chu vawiin khan Sawrkar Laipui a Ministry of AYUSH buatsaih, West Bengal leh Hmarchhak state te tana Regional Review Meeting on AYUSH Programmes, Taj Vivanta, Guwahati a neih ah a tel a. Health Minister hi Principal Secretary Pi Esther Lal Ruatkimi, IRS leh Deputy Director, AYUSH Dr.S.Mara Thansiami ten an tawiawm a ni.

Health Minister Dr.R.Lalthangliana pawhin Review Meeting ah thu sawiin Kum 2014 atangin National AYUSH Mission hi Mizoramah kalpui tan chauh ni mahse vawiinah chuan India ram state a Small state zingah a ti tha ber an nih theih thu te, chumi avanga Ministry of AYUSH lamin an duhsak bik zia te a sawi a. Khum 50 awm theihna tur 50 Bedded AYUSH hospital Aizawl-a sak an phalsak thu te, hemi bakah hian khum 10 awmna tur 10 Bedded AYUSH hospital Saituala sak tur thu a sawi bawk. Sawrkar Laipuia duh dana Health Sub-Centre 38, AYUSH Health & Wellness Centre a hlankai vek anih tawh thu leh tha taka an hna an thawh tawh thu te, NABH accreditation hmuh thuai an beisei thu a sawi bawk.

Health Minister chuan State Medicinal Plants Board hmalakna leh hmasawnna chungchang sawiin State Medicinal Plants Board, Mizoram chuan Research and Development lamah nasa taka hma la in, Mizoram a Ram hnim Damdawi awm te zirchianna chu Mizoram University nen ṭang kawpin a lo nei tawh thin a, neih chhunzawm zel an tum thute, Ram hnim damdawia hman ṭhin riral mai tur leh vang tak tak ṭhenkhatte chu humhalh a nih theih nan SMPB leh Krishi Vigyan Kendra, Dept. of Agriculture te chuan Nursery ah tihpun hna an thawh mek thute, State Medicinal Plants Board kal tlanga, Ramhnim damdawi a lo hlut a awmze nei zawk a chin pun leh hralh chhuah a nih theih nan Storage Godown, Processing Unit, Rural Collection Centre leh Value Addition Infrastructure-te ruahman belh zel anih thute leh Ramhnim damdawi chawi lar nan leh a hlutna in zirtir nan District 4 (Pali) a School 52 – ah School Education Department nen ṭangkawp in School Herbal Garden siam mek a nih thu te a sawi.

Minister hian Mizoram chu ramngaw nei tha kan ni a, North east ah pawh bio-diversity nei tha ber pawl kan ni, chuvangin kan ramhnim leh ramhmul te hi hmang tangkai tura tih tak taka kan tih chuan kan state economy ṭhanna tur hmanraw pawimawh tak tur a ni. Hetianga ramhnim leh ramhmul damdawi siam chhuah nan hian Central lam hian kalphung te pawh thlak hret a tul a hriat thu a sawi a. AYUSH hospital din belh a, doctor te pawh tun aia tam zawk lak belhna turin a bik taka ruahmanna siam ṭha a tih thu a sawi.

He review meeting hi Rajesh Kotecha, Secretary, AYUSH in kaihruaiin NE states a AYUSH dinhmun tlangpui report a pe a, Assam Chief Minister Himanta Biswa Sarma in state officials te lawmna thu sawiin, Dr.Munjpara Mahendrabhai Kalubhai, Hon'ble Minister of State for AYUSH leh Union Hon'ble Minister of State for AYUSH Sarbananda Sonowal ten thu an sawi bawk.

He meeting ah hian NE States leh W.Bengal States a Health Minister-te an kal kim hle a, Principal Secretary, Esther Lal Ruatkim'n Mizoram in National AYUSH Mission a kal pui chhoh dante, hmalakna hrang hrang kal mek leh hmachhawp awmte report a pe a. He review meeting ah hian W.Bengal leh NE state a official kal khawm ten National AYUSH Mission tha zawk a kalpui dan tur ruahmanna hrang hrang an neihte an sawi ho ani.

Review Meeting zawh hian Health Minister hian Guwahati-a Apollo Hospital tlawhin hospital thuneitute nen an inkawm a. Minister hian Apollo Hospital chu Mizo mipuiin an pan tam pawl tak a nih avangin Mizo damlote hriatthiamna nena lo dawngsawng a, sum lama harsatna nei bill pe thei lote pawh lo hrethiam ṭhin turin a chah a. Minister hi Guwahati Mizoram House a Deputy Resident Commissioner Dr. Malsawmtluanga Fanchun in a ṭawiawm a ni.