1657/2023-2024

Hnahthial the 25th August 2023: Vawiin khan Mamit, Aizawl, Serchhip leh Hnahthial District E-Roll observer Dr. Lalzirmawia Chhangte IAS, School Education Department Secretary ni bawk hovin Special Summary Revision of E-Rolls, 2023 thlir hona meeting chu Hnahthial Bawrhsap Pu Chuauhnuna kaihhruainain DC Conference Hall-ah neih a ni.

Meeting-ah hian Dr Lalzirmawia Chhangte IAS chuan kum 2020 atanga E-Roll Observer-a a tan tawh thin thu sawiin Roll felfai leh thianghlim tak neih theih nana E- Roll buatsaihna kawnga thawktute zawng zawng chungah lawmthu a sawi a, India khua leh tui dik tak, kum 18 tling tawh chin leh kumin Special Summary Revision hmangin October ni 1 2023-a kum 18 tling tur te chu e-roll a thunluh theih an ni tiin ziahluh kawngah tang zual sauh turin Election Branch-te a fuih bawk. ECI chuan kum 18 tling tawh India khua leh tui nihna dik tak nei chu tumah hmaih a phal lo tiin kum tinin Continuous Updation hmangin e-roll ah a inziahluh theih tih a sawi a, amaherawh chu mipui vantlangin office a kalchilh a,mahni inbuaipui vek a tul thu tarlangin Special Revision-ah erawh ECI remruatna in khua leh veng tinah an kalchilh thin a ti a, chu chu remchang a lain roll a in ziaklut theuh turin mipui a sawm a ni. E-Roll felfai leh thianghlim chu mipui rorelna (Democracy) rama Inthlanna felfai,langtlang leh huapzo neih theih nana lungphum pawimawh hmasa ber a ni a ti a, heti khawpa ram zau leh hnam hrang hrang awmkhawmna ram a mipui rorelna hrisel leh chak tak vawn nun zel a ni thei hian India ram ropuina a ti langchiang hle a ti bawk. Pu Lalzirmawia Chhangte IAS chuan e-roll/ voter list felfai leh thianghlim a pawimawh hle tiin ram danga inthlanna felfai tawk lo thin pawh voter list a fel loh thin vang a ni a ti a, a chuang tur dik tak tên special summary hunlai hi an bawhpelh loh a, an chhawrbawk theih nan tan lakpui a theihtawp chhuahpui turin NGO hruaitute leh political party aiawh kalkhawmte a sawm bawk a ni. Vawiin meeting zawh hian E-Roll Observer Pu Lalzirmawia Chhangte IAS chuan South Tuipui AC huamchhunga Polling Station thenkhat a tlawh nghal bawk.

Hnahthial District Election Officer Pu Lalbiakfela pawhin 29-South Tuipui AC huam chhunga District Election Office hmalakna hrang hrangte tarlangin Draft Roll hnuhnung berah vote nei mi 15875; mipa 7867 leh hmeichhia 8018 an awm thu a tarlang a, Polling Station 27 awmin Hnahthial khawchhungah 6 a awm a, rural area ah 21 a awm thu a tarlang bawk. Mahni Booth Level Officer (BLO) te kaltlang kher lovin Online hmanga roll a inziahluh theihna National Voter Service Portal (NVSP) bakah Playstore a download mai tur Voter Helpline app a awm thu sawi bawkin hmang tangkai theuh turin a chah a, mipui vantlang tên tangkai taka an hman theih nan hrilhhriatna kawngah hma lak pui turin kalkhawmte a sawm bawk a ni.

Vawiin thutkhawmah hian ERO leh AERO bakah Political party hrang hrang aiawh te, NGO aiawh te, Election office staff-te leh sawmbik te an tel a ni.