1658/2023-2024

Ni 23 August, 2023 chawhma dar 9:30 am bawr vela North East Frontier Railway kawng ABCI-BBJ Joint Venture ten Bairabi-Sairang rel kawng an siam mek a lei Bridge No. 196, Sairang Zero point bula an dawh lai chu vanduaithlak takin a chim hlauh mai a.

Contractor sawi danin he lei dawhlai chimah hian hnathawk 26 an awm a, Mitthi 23 awmin, hliam tuar 3 an awm a ni. Chhiatna thlen thu report dawn a nih veleh Disaster Management & Rehabilitation Department pawhin theih ang tawka hma la nghalin State Disaster Response Team awmna Mizoram Police Battalion te, National Disaster Response Force Team, Aizawl a awmte, Aizawl District Disaster Management Authority (ADDMA) te, Sorkar department pawimawh dangte leh tlawmngai pawl dang te hrilh hriat an ni a. DM&R Joint Director (Operation) leh a team te chuan chhiatna thlenna hmun an pan nghal bawk. State Emergency Operation Centre atangin State Sorkarah report pek chhuah a ni. State dang atangin an khua leh tui te chanchin zawhna te chhan a ni bawk. Director, DM & R leh a team te pawh chhiatna thlenna hmun an thleng zui ve nghal bawk.

Deputy Commissioner, Aizawl, Director, DM&R, S.P. Aizawl leh an naute, SDRF leh NDRF te, Quick Response Team (QRT) te, BSF te, Aapda Mitra Volunteers te, Mizoram Police te, Medical Team te, Sairang leh Lengpui khawtlang hruaitu leh tlawmngai pawlte leh CYMA lam atangte in a theih ang anga chhanchhuah hna thawk turin an rawn thawk chhuak nghal a, hmanraw tul leh damdawite nen mi engemawzatin a hmun hi an thutchilh nghal bawk a ni.

Lei dawh lai chim hnu hian mitthi ruang 17-te hi hmuh nghal mai a ni a, a dang pawh hmuh ngei tumin ngawrh taka zawn nghal a ni a, ruang dang pakhat chu hemi ni hian hmuh a ni leh a, a tuk ni 24.08.2023 (Ningani) chhunah ruang 4 (pali) dang hmuh niin, vawiin ni 25.08.2023 (Zirtawpni) khan ruang pakhat hmu lehin ruang zawng zawng hmuha lakchhuah kim a ni ta a ni.

Chhiat tawhna hmun hi DM&R Minister, Home Minister ni bawk Pu Lalchamliana chuan tlawhin mitthi chhungte a tawrhpui thu a sawi a; chhiat tawhna hmun hi Pu T.J. Lalnuntluanga, Transport Minister, Pu C. Lalrosanga, MP, Lok Sabha, Pu Zothantluanga, MLA, Pu K. Laldawngliana, MLA, ten an tlawh bawk. Chief Secretary, Chairman, State Executive Committee ni bawk Dr. Renu Sharma leh Sawrkar Official pawimawh dangte pawhin tlawhin, hmalak theih dan hrang hrangte a hmunah hian an enfiah a ni. Director, DM&R chuan Sairang Dinthar Branch YMA kutah chhanchhuah hna thawh nana an mamawh zual phuhruk nan Rs. 5,000/- hlanin, Silpoulin 1 bundle a hlan bawk.

Quick Response Team (QRT), ADDMA leh SDRF te chuan lei innghahna ban (bridge pillar) chhip (metre 100 zet a sang) atangin hnathawk pakhat hliam na tak tuar chu anmahni nunna thâpin an chhanchhuak a. Hetiang chetsual hlauhawm takah pawh mahni nunna thapa QRT-ten chhanchhuah hna an thawk hi a ropui hle.

Hliam tuar te hi Sairang Hospital-ah leh Aizawl Civil Hospital-ah enkawl an ni a, mi 2 hi chu chhuah tir lehnghal an ni. Mitthi ruang hmuh te hi Sairang Dinthar YMA Hall-ah lak khawm niin Police, Forensic leh Contractor ABCI Company ten tute nge an nih an finfiah (Identify) vek a. Medical lam ten PME an tih zui hnuah, a tul anga sawngbawl (Embalming) tih a ni leh a, Railway thuneitu/Contractor te kut-ah an chenna khua theuhva thawn turin hlan an ni.

Vawiin (25.08.2023) hian ruang zawn chhunzawm hna hi Quick Response Team, ADDMA, 5th Bn MAP a SDRF team, Mizoram Police Dog Squad leh uifing 2, National Disaster Response Force Team, 38th Bn BSF leh uifing 1, Sairang, Sairang Dinthar, Sihhmui Village Council leh YMA Branch member tlawmngai te, Health Department atangin Medical Team leh an hmanrua ambulance te, Sairang Police Station a police mi leh sa te chuan ngawrh takin an thawk zui a, chawhnu dar 1:04 khan mitthi ruang hnuhnung ber hi la chhuakin, mitthi zawng zawng mi 23 ruang hi hmuh kim an ni ta a ni.

He chhiattawhnaa chhanchhuah hna leh ruang zawn hna thawhna kawngah, Kristian nunzia leh Mizo tlawmngaihna nunze mawi tak lan chhuah tira, tha leh zung, theihna zawng zawng sengtu te chungah Mizoram Sawrkar chuan lawmthu a sawi mawlh mawlh a ni.