No.2077/2020-2020

Aizawl, the 16th June 2020 : Vawiin khan Lunglei Civil Hospital-a RT-PCR Diagnostic Laboratory din theih nana hemi chungchang zirchiang tura Sawrkarin a tirh mithiam pathum telna Expert Team chuan an thil hmuh dan leh an rawtna te chu Health Minister Dr. R. Lalthangliana hnenah a Pisaah an thehlut a. Expert Team-in an thil hmuh dan tlangpui an sawinaah Information & Public Relations Minister Pu Lalruatkima; Social Welfare Minister Dr. K. Beichhua; COVID-19 Medical Operational Team Chairman Dr. ZR. Thiamsanga; Chief Secretary Pu Lalnunmawia Chuaungo; Health Secretary Pu H. Lalengmawia leh NHM Mission Director Dr. Eric Zomawia te an tel a ni.

Health Minister Dr. R. Lalthangliana chuan rang taka Expert Team in an thil hmuh dan te an thehlut chu lawmawm tiin an hnenah lawmthu a hrilh a. Lunglei a RT-PCR Diagnostic Laboratory din vat chu Sawrkar duh dan a ni a, mahse a behbawm leh a ken tel thil dang dang bakah ICMR phalna te a ngaih avangin pawngpaw hmanhmawh ngawt theih a ni lo tiin a sawi.

Expert Team a tel mithiam pahnih - Dr. H. Lalhlenmawia, HoD, Department of Pharmacy, RIPANS leh Dr. Vanramliana, Asst. Professor, Zoology, PUC te chuan an thil hmuh dan tlangpui sawiin Laboratory din nan, RT-PCR khawl neih mai a tawk lova, a behbawm khawl dangte leh mamawh hrang hrang te bakah ICMR atanga phalna te a ngaih avangin Laboratory din nan tlemin hun a duh rei deuh tur thu an tarlang.

Tarlan tawh angin Expert Team a tel mithiam pathum - Dr. H. Lalhlenmawia, HoD, Department of Pharmacy, RIPANS; Dr. John Zothanzauva, Associate Professor, Dept of Environmental Sciences, MZU leh Dr. Vanramliana, Asst. Professor, Zoology, PUC te chuan nimin khan lehlanga kalin uluk takin Lunglei Civil Hospital-a RT-PCR Laboratory din a nih theih nana a hmun hma te, mamawh belh tur thil hrang hrang te a hmunah kalin an enfiah tawh a ni.

Attachment

  • Loading attachment...