Vawiin khan Health Minister Dr R Lalthangliana’n Civil Hospital Aizawl a tlawh a, Ward hrang hrangte tlawhin damlo hman turin HI-Tech Medical & Surgical Unit a hawng bawk. Health Minister Dr R Lalthangliana hi Social Welfare Department Minister Dr K Beichhua, Sports & Youth Affairs Minister Pu Robert Romawia Royte leh Dr ZR Thiamsanga, MLA ten an tawiawma, Civil Hospital Aizawl a thawktute, Health & Family Welfare Department a hotute, Dawrpui khawtlang hruaituten he hun hi an telpui a ni.

Health Minister Dr R Lalthangliana chuan,” Civil Hospital Aizawl ah hian hmu theihin Infrastructure-ahte, thianghlimna kawngahte, thawktute hawihhawmaahte nasa takin hmasawnna ka hmu a ni,” a ti a, “State Referral Hospital Falkawn tih changtlun nan pawh hma kan la chho zel dawn a ni,” a ti bawk. Dr R Lalthangliana chuan,” Thawktu tur ngaihtuah hmasa lova hmalakna awm thin hi a pawi hle a, heng kan khawl tharte hi neitu anga enkawltu tur lak hi a pawimawh hmasa hle a ni,” a ti bawk. Health minister chuan Civil Hospital Aizawl atan MRI khawl neih ngei a tul thu sawiin Hospital atanga tui chhe paihchhuah dan chu ennawn a nih thuai tur thu a sawi bawk a. H&FW department thawktute chu Mizoram mipuite hriselna atan a ngaihtuahna leh rilru seng turin a sawm a, Health minister office chu an tan a in hawn reng thu a sawi bawk. Dr R Lalthangliana chuan “ Tum dang ang lo takin Mizoram State a Member of Legislative Assembly atan damlo enkawlna lama thiamna nei Doctor kan ngah ber tum niin ka hria a, hei hian hriselna kawngah kan ram tan hmasawnna nasa tak a thlen ngei ka ring a ni”, a ti bawk.

He hun hi Dr KL Remsanga, Medical Superintendent, Civil Hospital Aizawl in a kaihruaia, Social Welfare Department Minister Dr K Beichhua, Sports & Youth Affairs Minister Pu Robert Romawia Royte leh Dr ZR Thiamsanga, MLA ten thu sawina hun neiin Dr John Zohmingthanga’n Civil Hospital Aizawl report tlangpui pekna hun a hmang bawk. Hospital Poor Fund atan Dr R Lalthangliana chuan cheng Sing Khat a hlan bawk.

Civil Hospital Aizawl hi kum 120 a upa niin, tunah hian Khum 275 a awm mek a, Clinical department 15, Superspeciality department 1, Para-clinical department 4 leh support service hrang hrang ten en hospital hi a kal mek a ni. Post graduate (DBN) zirna subject Panga (5) a awm a, MCI leh Indian Nursing Council te pawmpui Training Institute a ni a, ICMR, Department of Biotechnology, MZU, RIPANS ten en thawk hovin Medical research engemaw zah kalpui mek a ni bawk. Model blood bank ah hian kum 2018 January atanga November thleng khan thisen Unit 13252 dawn a ni a, Blood donation camp tum 154 buatsaih a ni bawk. AB-PMJAY hi October 2018 atang khan Civil Hospital, Aizawlah hman tan niin he scheme khawih tur te hi a bika training pek an ni a, tunah hian Hepatitis C vei mi 1240 te chu he scheme hnuaia ziah luh tawh an ni.