2602/2022-2023
Aizawl, the 10th November 2022 : Health & Family Welfare Minister Dr. R. Lalthangliana'n vawiin khan Hmarchhak huap Medical Microbiology (Parasitology) mithiamte intawhkhawmna Tropical Diseases of Parasites Conference TROPACON NE 2022 chu Art & Culture Auditorium, Berawtlang ah a hawng a. Conference hi Department of Microbiology, Zoram Medical College leh Indian Academy of Tropical Parasitology (IAPT) North East Chapter tangkawpte buatsaih niin thupui ah 'Emerging & Re-emerging Tropical Parasitic Diseases' hman ni.

Dr. R. Lalthangliana chuan natna hrik hrang hrang natna thlen thei chungchang zirna mircrobiology leh chumi hnuaia peng parasitology chu medical field ah a pawimawh viau a rin thu sawiin heng subject te hi non-clinical specialities nih mahse clinical specialities te tan, eng in nge natna a thlen tih an hriat hma chuan damdawi a chawh mai thei lova, chuvangin an pawimawh hi a sang viau niin a lang, a ti a. Mizoram in microbiologists leh parasitologists mithiamte intawhkhawnna a thleng chu mithiam microbiologist mai bakah Mizoram pawhin hriselna tha a neihna kawngah a hlawkpui ngei a beisei thu a sawi.

Covid-19 hripuiin thawhkhatna March leh April 2020 chho ah Mizoram in Covid-19 test a neih loh laia sample test-na kawnga harsatna a tawh dan chanchin te sawiin Mizorama microbiology lama mithiam leh mithiam dangte - College of Veterinary Sciences, Selesih, MZU, PUC leh RIPANS ami te chuan RTPCR Laboratory dinna kawnga Sawrkar ruahman siampuiin hun reilotea RTPCR Lab kan nei a, anni hian Mizoram tan an thawhhlawk hle a, an thiamna kha Sawrkar leh mipuiin kan chhawr tangkai hle a ni, a ti.

Health Minister chuan Mizoramin Medical College a neih chhun Zoram Medical College chanchin sawiin tunhnaia hmasawnna thar a neih te a sawi lang a. ZMC in genome sequencing tih theihna an nei te, Anti Microbial Resistance Laboratory te, TB Lab te, Zoonotic Diseases Surveillance Centre leh Multi Disciplinary Research Unit (MRU) a neih te hian natna hrik, natna thlen thei hriatchhuah vat kawngah te, an chanchin zirna kawngah te leh natna hrik in siamdanglam emaw, natna chungchanga thil danglam an hmuhchhuah in rang taka heng te hi Institute liana thlen vat kawngah heng Laboratory leh Unit te hi an pawimawhna a sang viau dawn tiin a sawi.

Health & Family Welfare Department Principal Director pawhin thusawiin Conference chuan Mizoram leh ZMC tan natna hrik chanchin zirna kawngah rahbi pawimawh tak a ni, a ti. Conference hawnna programme hi ZMC Director Dr. John Zohmingthanga’n kaihruaiin Conference a tel te a lawm a. Prof. (Dr.) Ujjala Ghosal. Secretary, IATP, HOD Department of Microbiology, Sanjay Gandhi Post Graduate Institute of Medical Sciences, Lucknow chuan Indian Academy of Tropical Parasitology chanchin tlangpui sawiin hun a hmang a. Conference Organizing Chairperson, ZMC Registrar Dr. Jane R Ralte in lawmthu sawiin Conference hawnna inkhawm chu a khar. Chawhnu lamah mithiamte an Paper presen-na hun te neiin Oral leh Poster Presentation te pawh neih a ni bawk.

Conference ah hian Ramchhung leh Hmarchhakah atangin natna thlentu natna hrik zirbing mithiam microbiologists lar tak te rawn telin an zirbingnaa thil an zir mek leh an hmuhchhuah chungchangah presentation te neiin sawiho hun tha tak an hmang a. Nimin lamah Zoram Medical College ah Conference peng pakhat atan natna hrik microbiology chungchangah Continuing Medical Education programme an hmang bawk a ni. Conference ah hian Hmarchhak Medical College hrang hrang bakah MZU, ZMC, CVSc atangin mithiam 53 an tel a ni.