2603/2022-2023
Aizawl the 10th November 2022 : Vawiinah khan MGNREGS hnuaia State Employment Guarantee Council chu an Chairman Pu Lalruatkima, Rural Development Minister hovin Secretariat Conference Hall, MINECO-ah an thukhawm.

Minister Pu Lalruatkima chuan kumin State Employment Guarantee Council thutkhawm a ni chu lawmawm a ti a. Mizoram sawrkar chuan MGNREGA hlawhtlin zel nan nasa takin hma a la zel a, ni 100 inhlawhna hi thingtlang lonei mite chhawmdawltu a nih bakah leh hmun hrang hrang a ram leilung humhim leh tuihna humhalh bakah tui lakna siam nana hmanrua tha tak a ni tiin a sawi. MGNREGA kalpui na tur atana central sawrkar in sum a pek atangin ni 80 atanga ni 85 inhlawhna a awm tawh thu sawiin, central sawrkar chuan sum hman zawh anih hunah a bak thawhna tur a la rawn pek leh a rin thu a sawi.

He thutkhawmna-ah hian MGNREGA Mizorama kalpui anih dan te, harsatna leh hmachhawp bakah hmasawn dan te thlirho a ni a, chung zingah chuan Draft Mizoram MGNREGA Personnel (Recruitment and Condition of Contract Guidelines, MGNREGS Employtee te one-time increment chungchangte, vantlang/khawtlangin an chhawr tangkai tur community assets siam nana material component inhman tawm dan kalpui mek te thlirho leh sawiho a ni.

MGREGA hnuaiah hian Job Card issue zat hi 2,13,348 a ni a, active job cards hi za zelah 99.53% a ni a. Geo-MGNREGA (Bhuvan), hnathawh zawh atanga asset geo-tagged hi 96.82% a ni a, Mizoram chu India ram a geo-tagging ti tha ber kan ni. MIS atan hian SECURE Soft hman a ni a, Direct Benefit Transfer atana Aadhaar seeding hi 98.58% niin, Mizoram chu bank account leh aadhaar intlunzawm tha pawl state niin, 100 ah 100 a nih theih nan Project Director ten an bial tin-ah hma an la mek bawk a ni. Tunkum April ni 24 atanga Prime Minister in a hawn, Mission Amrit Sarovar chu MGREGA nen inthlun zawmin, he mission hnuaiah hian 62.5% thawh a ni tawh bawk a ni a, district hrang hrangah rainwater harvesting, tuihna humhalh leh tuilakna tur te siam a ni bawk a ni.