2604/2022-2023
Dated Serchhip, the 10th November, 2022: Vawiin hian Serchhip DC Conference Hall ah Mizoram State AIDS Co ntrol Society leh Central YMA ten an buatsaih Zoram Harh Rawh Campaign kalpui a tulna leh a kalpui dan tur inhrilhhriatna hun buatsaih a ni.

He hun hi Dr. Lalnunhlima Khiangte, District AIDS Control Officer in a kaihruaia, Pi Nazuk Kumar, IAS, Serchhip Bawrhsap leh Pi Zuiliani Hrahsel, Jt. Director, MSACS ten HIV/AIDS a kan ram dinhmun tlangpuite sawiin he hmalakna hmanga inzirtirna leh a dona thalaite zinga kalpui dan tur ruahmanna hrang hrangte sawifiahna an nei a ni.

Zoram Harh Rawh Campaign hi Mizoram State AIDS Control Society leh Central YMA te tangkawpin Mizorama HIV/AIDS lo pung zel dona tura an thawh dunna a ni a. District tinah District Level Committee din niin anni hmalakna hnuaiah hian Cultural Dance leh Song hmanga inelna buatsaih a ni ang a, chuta tel Cultural Troupes zawng zawngte tan HIV/AIDS chungchang inzirtirna buatsaih tur a ni. Tin, District Level Committee hian HIV/AIDS lama district dinhmun leh engtia hmalak tur nge tih sawihona buatsaih tur a ni a. Heng programme pahnihte hi zau taka Media hmanga puanzar tur a ni.

Mizoramah kum 1990 October thla atanga chhinchhiah chinah mi 25982 in HIV/AIDS an kai tawh a, an zinga mi 3506 hi an thi tawh nia chhinchhiah chin an ni. HIV/AIDS vanga thi chhinchhiah si loh hi engemawzat awmin MSACS chuan an ring a ni. Mizorama puitling chin, kum 15 - 49 inkar zinga HIV hrik inphum ruk dan hi za zela 2.7 vel zet ni mek thei nia ngaih a ni. Mizorama HIV kai za zela sawmruk panga hi Sex vanga kai an ni a, mahni nupui/pasal te ngei atanga kai te an tam fal hle a, hei hi mahni ngaihzawng leh nupui pasal pawh ni lote nena mipat hmeichhiatna hman mai mai kan chin vang nia ngaih a ni. Inkaichhawn tamna dangte chu ngaihzawngte atanga kai te, mipa leh mipa inngaizawng atanga kai te leh ruihhlo leh a kaihhnawih thil te a ni. He natna hi mipui mimir zingah nasa takin a lut tawh a ngaih a ni a, nawhchizuar atanga inkaidarh hi chu za zela pathum vel chauh a ni.

Pu PC Vanlalluna, Secretary, Sub Headquarters YMA chuan lawmthu sawiin hun a khar a ni.