963/2023-2024

Aizawl, the 28th June 2023 : Vawiin khan Health & Family Welfare Minister Dr. R. Lalthangliana hovin chuan Manipur tualchhung buaina avanga Mizorama Zohnahthlak raltlante chungchang meeting neih a ni a. Meeting ah hian Central YMA hnuaia raltlan buaipuitu Sub-Committee te leh Covid-19 hripui len nasat laia din Committee on Psychological & Social Guidance te an tel a ni.

Health Minister chuan hmanni lawka raltlan camp a tlawhnaa Manipura kan Mizo unau buaina tawk te thil tawn rapthlak takin an rilru lamah nghawng a neih nasat dan tur te sawiin, Covid-19 hripui len laia din Committee on Psychological & Social Guidance chuan hemi kawngah an thawhhlawk thei dawn a tiin he Committee te inhuamnaah lawmthu a sawi a. CYMA in raltlan a bawihsawm dan chu ropui a tih thu a tarlang bawk. Meeting-ah hian CYMA chuan raltlan camp hrang hranga awmten harsatna an tawh te an tarlang a. Committee on Psychological & Social Guidance lam pawhin raltan te tan thawh an inhuam thu an sawi bawk a ni.