No.254/2020-2021

Vawiin chhun khan Union Health Minister Dr. Harsh Vardhan hovin India ram State hrang hrang a Health Minister leh Health department mi pawimawhte’n Video Conferencing neiin COVID-19 do nana hmalakna leh inbuatsaih dan te an thlirho a, hmalak zel dan tur leh mamawh thil chi hrang hrang an sawiho a ni.

Video Conferencing ah hian Dr R. Lalthangliana, Mizoram Health Minister chuan thusawina hun tha tak changin Mizoram dinhmun leh mamawhte a thlen a. Dr R. Lalthangliana chuan Zoram Medical College (ZMC) a COVID-19 Testing Laboratory din a nih theihna tura sorkar laipuia Ministry of Health & Family Welfare (MoHFW), Indian Council of Medical Research (ICMR) leh National Institute of Virology (NIV), Pune te’n theihtawpa an puihna zarah Covid-19 test theihna Mizoram ngeiah a awm ta, tiin lawmthu a sawi a. Kawng engkimah thurawn pawimawh tak tak rang taka Central sorkarin a rawn pek thin avang leh harsatna phuhru tura tanpuina sum an rawn pek avangin lawmthu a sawi bawk a ni.

Dr. R. Lalthangliana chuan Mizoramin COVID-19 hneh tura a mamawh chi hrang hrang a thlen zingah Mizoramin ZMC leh Aizawl Civil Hospital bak district hospital dangahte ICU a neih thuai theih nan chak taka hmalak pui turin Union Health Minister a ngen a; Mizoramin international border kilometer 722 laia thui a neih avang leh thenawm state hrang hrangah Covid-19 vei hmuhchhuah an tam sawt tak avangin screening test tih zung zung theih nan Covid19 test-na rang chi -‘Rapid Antibody tests’ leh ‘Trunat tests” tam tawk pe turin a ngen a. PCR test kits pawh thahnem tak pek belh leh thuai turin a dil bawk.

Dr. R. Lalthangliana chuan Mizoram chhunga district hrang hrangah mithiam – Microbiologists leh Epidemiologists te mamawh belh an nih thu a thlen bakah, district hrang hrang tan Basic Life Support Ambulance (BLSA) mamawh a nih thu a thlen. Thawktute veivah zung zungna tur lirthei leh samples dah thatna Ice-lined Refrigerators (ILR)/Deep Freezers mamawh belh a nih thu pawh thlenin, National Health Mission leh Health department ah te fund tam zawk pe turin a ngen a, Covid-19 enkawlna tur chhawngthum – Covid Care Centre (CCC), Dedicated Covid Health Centre (DCHC) leh Dedicated Covid Hospital (DCH) te siamna tura thil pawimawhte ngaihtuahpui zel turin a ngen bawk a ni.

Health Minister hian heng a thu thlente hi chak taka bawhzui a nih theih nan lehkha ziakin a thawn zui nghal a ni.

Health Minister hi Pu H.Lalengmawia, Health Secretary; Dr Eric Zomawia, Mission Director, NHM leh Dr Pachuau Lalmalsawma, SNO (Covid-19) te’n an tawiawm a ni.

Video Conferencing zawh hian Health Minister hian Aizawl khawchhung veng hrang hranga Local Task Force leh police duty-te a tlawh kual nghal a, an inpekna leh thawhrimna avangin lawmthu a hrilh a, ram leh hnam damkhawchhuahna tur a huaisen taka ke penchhuakte an ni tih sawiin, tha thlah lova, theihtawp chhuah chhunzawm turin a ngen nghal a ni