Nimin leh vawiin khan Health and Family Welfare Department changtu Minister Dr R. Lalthangliana chuan Tlabung Sub Division Hospital leh Lungsen Primary Health Centre-te tlawhin thawktute nen inkawmhona hun hmangin hmalak dan tur an sawiho. Vawiin vek khan Health Minister hian Kawrpuichhuah tlawhin ‘Coronavirus Screening Point’ a hmalakna a hmunah kalin a enfiah.

Minister hi Lunglei HPC Vice Chairman Pu Lawmawma Tochhawng, Bamboo Development Board Vice Chairman Dr K. Pachhunga, Commerce & Industries Director Pu J.Hmingthanmawia, Lunglei CMO Dr. Thani Pachuau, Medical Superintendent Dr SR Ngurchamliana leh official dangte leh party hruaituten an tawiawm a ni.

Nimin tlaia Lungsen Primary Health Centre a tlawhna ah Medical Officer Dr Christina Zonumawii leh a thawhpuiten lo dawngsawngin PHC hi an fan kual pui a. Tin,vawiinah Tlabung Sub Division Hospital-ah SMO Dr R.Lalnienga leh a thawhpuiten lo hmuakin Tlabung SDH hi an fang kual bawk a. Minister hnenah hian an harsatna leh mamawh hengte – building sak that, ambulance leh lirthei mamawhna, techinician leh nurse indaihloh chungchangte anlo thlen a ni.

Lungsen PHC leh Tlabung SDH-ah te Health Minister chuan H&FW Department thawktute thawhrimna leh inpekna chu fakawm a tih thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi a. An hnathawh ropui tak avangin mi tam takin damna an chang thin a ni tiin an hahna leh an inpekna chu a thlawn lo a, mipui rawngbawltu pawimawh tak an ni tih hre thar leh fo thin turin a chah a. 

Sawrkarin H&FW Department hnathawktute mamawh a hriatpui thu sawiin World Bank leh sawrkar laipui kaltlanga hospital infrastructure pawh tih changtlung zel tura hmalak mek anih thu a tarlang a. Mipui hriselna uluk leh huamzau zawka enkawlna sawrkar laipui hmalakna Ayushman Bharat Health and Wellness Centre chu PHC 50-ah kalpui mek niin sawrkar kum tharah PHC 50 dangah kalpui tum a nih thu a tarlang bawk. Mizoram SEDP Healthcare Scheme chungchang pawh sawilangin Minister chuan MSHCS-a inziah luh man hi BPL chhungkaw tan Rs 100/- niin, APL chhungkaw tan Rs 1,000/- niin chhungkaw khatin kum khatah damdawia inenkawlna senso Rs 2,00,000/- (nuai hnih) thleng an bill thei dawn a ni tiin he scheme hi mipuiten an hman tangkai theihna turin H&FW Department hnathawktute chu theihtawp chhuah turin a chah a. Mipui hriselna ah ‘Community Participation’ a pawimawh thu pawh sawiin NGO-te leh khawtlang hruaitute pawh thawhho puiah a sawm a ni. Tin,Lunglei District khawtlang lam khuate tan hriselna chungchang inhrilh hriatna leh inzirtirna ‘One Day Healthcare Awareness Campaign’ kalpui tura ruahmanna siam mek a nih thu a tarlang bawk.

Minister hian vawiinah Kawrpuichhuah tlawhin Health Department buatsaih ‘Coronavirus Screening Point’ a hmalakna a hmunah kalin a enfiah a. Tunlaia China leh khawvel ram dangte ngaihven hlawh tak Novel Coronavirus (2019-nCoV) natna leng mek laka lo invenlawkna turin India leh Bangladesh ramri depa awm, Kawrpuichhuah Lunglei District-ah nimin atang khan Mizoram sawrkar chuan Medical Team duty tur a dah a, ramri kaltlanga veivak leh khualzinte endik hna an kalpui tan a ni. Nimin (10^th February, 2020) khan mi sawmpariat (18) screen niin tun dinhmunah Coronavirus vei la hmuhchhuah an ni lo.

Minister hi Kawrpuichhuaha 60 Bn BSF hotu Assistant Commandant Pu SK Pareek nen inkawmin Coronavirus Screening kalpui mek chu an theihtawpa lo tawiawm tur leh hma la turin a chah a. 60 Bn BSF hnuaia Male Nurse ten Coronavirus Screening kalpui mek hi an tawiawm tur thu Pu SK Pareek chuan Health Minister hi a hrilh a ni.