Tunlaia China leh khawvel ram dangte ngaihven hlawh tak Novel Coronavirus (2019-nCoV) natna leng mek laka Champhai District lo him  leh invenlawkna  tura din, District Task Force on Corona Virus Outbreak chu a vawikhatna turin vawiin chawhnu khan Bawrhsap Pu SL Naveen, IAS hovin  DC Conference Hall-ah an thukhawm.

Meeting-ah hian Champhai District chu International Border-a awm anih avangin Novel Coronavirus leng darh zel tur  laka   fimkhur angaih thu tarlan niin, meeting chuan ramri kaltlanga veivak leh sumdawng thinte chu he natna len mekna hmun leh a chhehvelte laka fimkhur turin a ngen a. He hunah hian mihring veivak leh ran khuahkhirh anih dante ngaihthlak a ni bawk a.  Champhai District ep Myanmar ram District-te nena inbiakpawh leh inzaitawn zela hmalak a tul thu pawh tarlan a ni a. District Task Force on Coronavirus Outbreak chuan ramri depa awm khuate chu tlawhchhuaka mipuite hnena zirtirna zau zawk kalpui nise, ramri kaltlanga lutte hriselna endik pahin chhui zui ngai awmte pawh chhuichian ni  se a ti a. Champhai District Hospital-a Isolation Ward ruahman ni se tih bakah mamawh tur ang budget-te pawh a rang lama siama thuneitu sang zawk hnena thlen nise tih a ni.

District Level Task Force on Corona Virus Outbreak hi Mizoram State Health Minister leh H&FW Department hotute January Ni 30, 2020 a thukhawm in an din tak State Level Task Force on Mitigation of Corona Virus duh dan anga district tina hma lo la tur a din a ni. Champhai District-a Zokhawtharah   February Ni 4, 2020 atang khan Medical Screening hi kalpui tan a ni a, khualzinte chinchang zawhfiah leh a tul anga endik hna hi  kalpui thin niin, Self Reporting Form mumal tak  kalpui tan a ni tawh bawk. Champhai District Task Force on Corona Virus Outbreak  chuan mamawhtute tana biak pawhna tur Mobile No-8588009756/9436376607 a siam bawk a ni.