No.1426/2020-2021 

Health & Family Welfare Minister Dr. R. Lalthangliana’n nimin tlai khan a pisa ah tunhnaia COVID-19 natna vanga Zoram Medical College (ZMC) a damlo awm enkawl damtu dartawr leh nurse te kawmin an inpekna leh huaisenna fakawm a tih thu a hrilh a, lawmthu sawina thilpek a hlan.

Health Minister chuan COVID-19 vanga damlo enkawl damtute chu Mizoram tan COVID-19 pasalthate an ni a ti a, an inpekna leh huaisenna bakah Pathian kaihhruaina leh Mizoram chhung leh pawna mi thahnemngaite tawngtaina chhanna a ni tih a sawi a, record ropui leh chhuanawm tak an nei tih sawiin COVID-19 damlo enkawltu zawng zawngte chungah lawmthu a sawi a. Health & family Welfare department inbuatsaihna pawh a tha tawk a ni tih hei hian a tilang tih sawiin department a thawktu zawng zawngte thahnemngaihna chu theihnghilh chi a nilo, a ti a. ZMC a sample testing laboratory nei tura hmanhmawk taka hma lak a ni a, COVID-19 hlauh vanga hnathawk tur an inhmuhzawh loh laiin Mizoram police mi 15 lai mai nihnih chhung hnatlanga an thawhchhuah avangin sample testing laboratory pawh a hun takah kan nei thei a ni, tiin Mizoram Police chungah lawmthu a sawi bawk a ni.

Medical Operation Team Chairman Dr. ZR Thiamsanga pawhin COVID-19 vangin India ramah ringawt pawh daktawr 24 in nunna an chan tawh a ni tih a sawi a, damlo enkawl tura huaisen tak leh chi-ai miah lova hna an thawh avanga lawmawm a tih thu sawiin thawhhona tha tak leh inbuatsaihna tha tak a awm vangin hlawhtlinna kan hmu a ni, a ti.

Dr. PC Lalramenga, Head of Department, Medicine, ZMC chuan an hnathawh a hriatpui vangin Health Minister chungah lawmthu a sawi a. COVID-19 do tura ZMC inbuatsaihna a tha tawk tih sawiin kumin January thla tawp lam atang khan mumal takin inbuatsaihna kalpui a ni a, ZMC a thawk ten training tha tak an lo neih tawh avang leh  hotuten hma an lo lak hma avangin COVID-19 positive case Mizorama a awm pawhin an talbuai lo tih a sawi. Dr. PC Lalramenga chuan COVID-19 natna hi natna hriatchian har tak a la ni rih a, damlo enkawl ngai an neih tirh khan an zamlo chu a nil ova, mahse chi-ai lovin an thawh turte that akin an ti thei a, ZMC a thawkte bakah hmun hrang hranga Mizo daktawr thiam tak takte engtiklai pawha biak rawn theih a an awm thin chu an hlawkpui hle tih a sawi bawk.

COVID-19 vanga damlo enkawltute hi daktawr 8, Ward Superintendent 3, nurse 25 leh IV-Grade 4 an ni a, COVID-19 natna vanga damlo hi a taksa ah virus a inthlahpun tam deuh avangin enkawl dam chhung hi a rei deuh ni a sawi a ni a, damdawiinah hian ni 45 awmin May ni 9, 2020 khan dam takin a chhuak a, a chhuah hnu hian home quarantine ti chhunzawmin tunah hian a zo fel tawh a ni.

Damlo enkawltute hian damdawi an pek danah ICMR leh AIIMS protocol fimkhur taka an zawm thu sawiin, tunah hian ICU ah damlo a rualin 14 an enkawl theih thu leh a tul dan huna hman atan ICU khum 22 awm theihna ruahman lawk a nih thu an sawi a. Mizoram pawna tangkhang lo haw turte uluk taka monitor a tula an hriat thu sawiin a bik takin Red Zone leh Containment Zone atanga lo haw te chu vil uluk zual a tul an tih thu an sawi a ni.

He inkawmhona hun hi Medical Operation Team Chairman Dr. ZR Thiamsanga, Health Secretary Pu H. Lalengmawia, Health Principal Director, ZMC Director leh Registrar bakah National Health Mission Director ten an hmanpui a ni.