2403/2022-2023
Aizawl the 21st October, 2022 : Vawiin khan Health Minister Dr. R. Lalthangliana chuan ZMC College Week kharna leh Cultural Day ‘ELIXIR 2022’ chu Vaivakawn Cultural Centre-cum-Auditorium-ah a hmanpui.

Khuallian Health Minister Dr. R. Lalthangliana chuan thusawiin kum 2 chhung hripui avangin ZMC College Week hman a nih theih tawh loh hnuah kuminah a vawi 3-na atan ZMC College Week hun hlimawm tak an hmang leh thei chu a lawmawm hle a ni a ti a. Covid hripui len laiin rampum chhungah ZMC chiah hi Covid enkawlna tur bik ‘dedicated hospital’ angin an awm a, a thawktute an inpekna leh thawhrimzia a fakawmin an entawntlak takzet a ni a ti. Sorkar chuan Zoram Medical College thuamthat leh tihchangtlun hna a thawk zel a, tunah pawh zirlai 80 ve ve awm theihna tur Male Hostel leh Female Hostel sak mek a ni a, hemi rual hian Interns’ Hostel room 60 a awm theih dawn bawk a ti. ZMC damdawi in khum 150 awmna thin kha tihchangtlung zel niin tunah hian khum 400 chuang dah a ni tawh a; khum 100 awmna, damlo enkawlna tur dang pawh sak zawh hnaih a nih tawh thu Minister hian a tarlang a ni. Heng enkawl tur hian medical staff, a bikin Nurse 60 vel lak tum a nih thu a sawi bawk. ZMC Academic Building peihfel thawhkhat tawh chu Union Health Minister hawn tir tum a ni, an sawmna a pawmpui hun chiah nghah a nih tawh thu sawiin Dr. R. Lalthangliana chuan ZMC Campus chhungah futsal ground, basketball court, gym leh SU office turte pawh ruahman tum a ni a ti. ZMC zirlaite chu an zirna piah lamah insawizai leh hriselna thate ngai pawimawh turin a chah.

Thu a sawi zelnaah Health Minister Dr. R. Lalthangliana chuan nakkumah ZMC atanga MBBS First Batch (2018) te chu an pass chhuak tawh dawn a, anni batch hian National Medical Inspection tha taka an paltlang chuan Zoram Medical College hmingthatna leh zahawmna thui takin a keng tel dawn a ni a ti a. Mizo doctor-te zingah MBBS chu an tam tawh naa mithiam bik Super Specialist an la tlem a, chuvangin tuna ZMC-a MBBS zirlaite pawh hetah duh tawk mai lovin, thiamna sang lehzual um turin a fuih a. Mizo zingah Cancer Super Specialist pakhat chauh an la awm thu leh tun hnaiah Super Specialist 2 - Cardiology (lung) leh Nephrology (kal) ah an awm leh ta chu lawmawm a tih thu a sawi bawk. JICA, Japan te nena thawk hovin Aizawl-ah Cancer Super Specialist Hospital din tum chu hna chak takin a kal mek a, he cheng vaibelchhe 700 senga sak tur Cancer enkawlna tur damdawi inpui hi 2028 kumtawp lamah peih hman beisei a nih thu a sawi a. India hmarchhak bialah cancer hospital tha ber a nih theih nan theihtawp chhuah mek a ni a ti.

ZMC Principal Dr. John Zohmingthanga pawhin kalkhawmte lawmna thu sawiin, a bikin Mizoram State pawn atanga zirlai lo lut zawng zawngte lo lawmin duhsakna a hlan a ni. ZMC College Week chhunga zirlaite an inelna chi hrang hrangah tithate hnenah Khuallian Health Minister Dr. R. Lalthangliana chuan lawmman a sem nghal bawk a ni.