2402/2022-2023
Aizawl, 21.10.2022: Chief Minister Pu Zoramthanga chuan vawiin khan Mizoram Civil Service Association (MCSA) General Conference vawi 46-na chu Aijal Club ah khuallian niin a hmanpui.

Chief Minister chuan ram hmasawnna atan sawrkar inrelbawlna kawngah kalphung felfai tak neih a, thawktu te pawhin tih tak zeta hmasawn duhna thinlung pu chunga an thawh a tul thu a sawi a. Hripui leng leh thil dang dang avanga state in sum harsatna a tawh dan tarlangin, sawrkar laipui atanga sum kan hmuh thin, budget ah pawh telh vek tawh hripui avanga vaibelchhe sang thum chuang kan hmuh tak loh thu a sawi a. Chung zawng zawng kara tun dinhmun kan thleng hi thil vanneihthlak tak a nih thu sawiin, chumi atanga kan kal leh zelna tur chu kan resource neih hrang hrangte tangkai thei bera hman a intundin a nih thu a sawi a. Ram chhunga kan neih sa mipui chawm zo hman tangkai theih ram zau tak, sik leh sa, ruahtui duhthusam te, heng resource hrang hrangte hi enliam mai lova, economy hmasawnna atana hman tangkai theih vek a ni tih rilru pu a, a nachang hre tura ngaihtuahna thlak a tul a ni, a ti a. Resource Mobilization mamawhna sawiin, chung atan chuan MCS officer te chu thurawn petu pawimawh dinhmun an luah thu a sawi. Khuallian chuan MCS Officer te chu an hna a rinawm leh thahnemngai taka thawk qàzui zel turin a chah a ni.

Chief Minister hian MCSA Official Magazine "RAHBI" a tlangzarh nghal bawk.

He hunah hian Pu H. Lianzela, President, MCSA pawhin thu sawiin, an association hmalakna hrang hrangte leh sawrkar atanga an beisei te tarlangin, sawrkar chungah lawmthu a sawi bawk a. Member ten sawkar hmalakna tihhlawhtlinna tura theihtawp an chhuah thin chungah lawmthu a sawi bawk.

Conference hi session hnih a then niin, hun hmasa conference hawnna programme hi Pu V. Lalengmawia, Vice President, MCSA chuan a kaihruai a. Chawhnu session hi Pu H. Lianzela, President-in kaihruaiin, MCSA Pledge lak a ni a, Report hrang hrang te ngaihthlak a ni a, MCS atanga IAS a kaisang thar mi pahnih Pi Sangchhin Chinzah leh Pi Zodingpuii te hnenah lawmpuina thilpek hlan a ni.

Hemi hnu hian rorelna neih zui a ni a, rorel tlangpuite chu:
1. District thar pathum Saitual, Khawzawl leh Hnahthial ah te District administration tih changtlun nise.
2. Arunachal-Goa-Mizoram-Union Territories (AGMUT) cadre atang hian Mizoram tan All India Service cadre hran neih nise.
3. Chak zawka Mizoram economy a than zelna tura State sawrkar hmalakna te MCSA in thlawp tlat nise.
4. Nasa zawka e-Governance kalpui tura State sawrkar hmalakna te MCSA in thlawp tlat nise tih te an rel.
5. MCS Officer-te hi Sorkar neitu kan nih angin, midangte aia hawihhawm, zaidam, thinnel leh thawk tam tur a beisei tlat kan ni a, chuvangin he dinhmun pawimawh tak hi ram leh mipuite tana theihtawp chhuah chunga vawng nung tlat zel turin, tun aia nasa lehzuala mahni awmna theuhah tan la turin.
Conference ah hian Mizoram Civil Service Officers thahnem tak an kal a, MCSA Honorary Member chatuan ram pan ta mi pathum (1) Pu Ngulsangvela, (2) Pu JK Khenglawt, leh (3) Pu H. Thawngchina te sunna hun hman a ni a, MCS Officer thar mi pathum te lawmluhna hun hman a ni bawk.

MCSA Pledge: Ram leh mipui rawngbawl theia min siamtu Pathian leh Sawrkar chungah lawmthu ka sawi a; Sawrkar leh Mipui tana theihtawp chhuaha rawngbawlin, ka finna leh theihna te hmanga ram nuam, changkang leh ram intodelh siam turin ka intiam thar leh a; Public Servant ka nih angin, mi harsa leh mi hnuaihnung ber te ban phâk ni turin theihtâwp ka chhuah ang a; Mipuiten an chanvo tur dik tak an chan a, râlmuang leh zalên taka he rama an chên theih nân theihtâwp ka chhuah zêl ang.

Inpekna thar nen, ram leh mipui tana rawngbawlin midangte tana malsawmna ni a, Mizoram Sawrkar leh Mizoram Civil Service ti hmingthatu ni zêl turin ka intiam e.