No.2821/2020-2020

Health Minister Dr R.Lalthangliana hovin vawiin khan Secretariat Conference Hall, MINECO ah Mizoram COVID19 dinhmun thlirin meeting pawimawh neih a ni a. Dr K.Beichhua, Social Welfare Minsiter; Dr ZR Thiamsanga, Medical Operational Team Chairman te pawh he meeting-ah hian an tel a ni.

Dr R.Lalthangliana chuan COVID19 dona kawnga thawktu zawng zawng te chungah lawmthu sawiin Department tin te an che tha hle ni a a hmuh thu a sawi a. Tun hnaiah District tin a fan chhuah thu leh an hmalak dante a hriatpui thu sawiin hah taka thawktute chungah lawmthu a sawi a, inthlahdul loa tan mar erawh a tul hle a ni, a ti. Health Minister chuan tangkhang a hlawma haw huk an awm tawh lova, lo lut tur pawh an tam tawh lo niin a lang a, mahni mimal motor-a zankhaw tairekah leh zing khawvar hmaa haw thin te chungchang thu erawh ngun lehzuala ngaihtuah a ngai, a ti a. Mizorama awm mek sipai leh paramilitary force - Assam Rifles, BSF, CRPF leh a dangte chungchang thu te; loh theihloh avanga phai lam mi Mizorama hnathawk tura chahluh ngaite chungchang thu te ngaihtuah uluk a ngai hle, a ti.

Tun hnaiah Lungleia BSF te leh Aizawla NDRF awm mekte zingah COVID19 positive engemawzat hmuhchhuah a nih thu meeting-ah hian sawi chhuah a ni a. Mipuiah an putdarh lohna tura khirh leh khauh taka ruahmanna felfai kalpui tul dan sawiho niin ruahmanna siam nise tiin an rel. Sipai leh paramilitary force-te zingah quarantine an kalpui tha tawk em tih leh COVID19 laka invenna tur ruahmannate an zawm tha tawk em tih en a, khauh lehzuala kalpui tha an ti. Hei bakah hian Mizoram sawrkar leh mipui mamawhna avanga phai atanga mithiam Mizorama chah luh ngai an awm thin a. Heng thiamna bik nei chah luhte hi hun reilote chauh Mizorama awm tur an nih avangin an pual hian manchawia an inkhunghranna tur leh helaia an awm chhunga hri an put darh lohna tura inkaihhruaina (SOP) fel tak duana zawm tir ngei ni bawk se, tiin an rel.

Vawiin meeting-ah hian tangkhang ni si lo thil pawimawh dang avanga state leh state inkara veivak te, district leh district inkara veivakte chungchang sawiho a ni a. Natna an thehdarh loh nan ruahmanna felfai zawk duan tul an ti. Mipui zinga he hri hi a darh lohna tura invenna kawng pawimawh tak pakhat driver leh handyman State leh State inkara veivak thin te zingah random test neih chu tha an ti a, a tul angin sawrkarin ruahmanna siam se an ti.

Vawiin meeting-a rel tur chhawpchhuah zingah hian private leh government hospital zawng zawnga screening kalpui dan tur te, district tina COVID19 medical helpline siam te, quarantine facility chhunga awmten natna hri an inkaidarh lohna tura ruahmanna siamte pawh a tel a ni.