No.2820/2020-2020

Lawngtlai, Vawkhniahzawn thla ni 7, 2020: Khuarel chhiatna emaw, rikrum thil dang emaw a thlen thulha rang taka che nghal thei tur, Lawngtlai District Disaster Management Authority (DDMA) hnuaia Quick Response Team (QRT) din thara trained specialist volunteer-te chu vawiin khan Lawngtlai Bawrhsap Dr Andrew H. Vanlaldika, MCS chuan a pisaah a lawm lut.

Bawrhsap chuan Lawngtlai District chu khuarel chhiatna thlen hlauhthawnawmna hmuna awm a nih avangin a venna leh inhmakhuana kawngah inthlahdah theih a ni lo tih a sawi a. Chhiatna a thlen thulha hma lak dan tur zir chhuak sa mi tlawmngai inpe thei Lawngtlai District-in a nei chu lawmawm a tih thu sawiin, QRT member-te chu theih tawp chhuah tur leh an hna tha taka an hlen chhuah theih nan an thiamna tuai hriam a, an hriselna pawh vawng uluk hle turin a chah.

Bawrhsap chuan QRT member-te chu chhinchhiahna (badge), kawrchung ban bul (vest) leh lukhum khawng (helmet) a hlan a. Addl DC Pu K. Laltlawmlova leh SDO (Sadar) Pu V. Lalruatliana bakah, QRT ai awhin Leader Pu C. Lalnunchama te'n thu an sawi bawk.

Mizoram State Disaster Management Authority (SDMA)-in state level leh district tina din tura a tih angin Lawngtlai District QRT hi din a ni a. Lawngtlai District chhunga mi, Central YLA tirha CTI (Central Training Institute) Sesawnga disaster management & response lam training zo tawh mi 9 chu member atan ruat an ni a. Chhiatna thlen thulhah anni hi che chhuak hmasa tur leh mipui himna atana a tul anga hma la tur an ni a. SDMA-in an inkaihhruaina leh hna thawh dan tur a duan angin an thawk dawn a ni.