Vawiin khan Health and Family Welfare Minister Dr R.Lalthangliana chuan Champhai District Hospital-ah    Dialysis khawl leh ICU tenau an tih mai, High Dependency Unit (HDU) chu hman mai theih turin a hawng. He hunah hian Health & Family Welfare Board Vice Chairman Dr. ZR Thiamsanga, Champhai North bialtu MLA ni bawk chu khualzahawm a ni.

Hawnna puala programme Champhai District Hospitala buatsaihah Health Minister chuan  Dialysis  leh HDU bunfel ani ta chu Champhai District leh a chhehvel khuate tana ni chhinchhiah tlak tak leh chanchin lawmawm tak a ni, a ti a. Khawl tha leh changkang tak peihfel anih theihna kawnga Champhai North leh South bialtu MLA te thahnemngaihna fakawm a tih thu leh Champhai chu Aizawl atanga lam hla tak anih mai piah lamah ramri dep hmun pawimawh tak  anih angin sawrkarin a ngaipawimawhin a thlahthlam loh thu a sawi a.  Sawrkar thar din atanga hun reilote chhungin hmasawnna ruhrel tam tak neih belh mek anih thu sawiin, Health Sector chu Chief Minister-in angai pawimawh hle a ni, a ti a. ICU kailawn pawimawh tak HDU leh Dialysis-te bunfel ani chu lawmawm tiin, Champhai District Hospital chu khum 100 thlenga tih len anih theihna turte, CMO Office sak leh Nursing School sak  zawh tawh hman mai lohahte pawh a tul leh tahtawl ang zela hmalak anih tur thute pawh a sawi a.  Hmasawnna ruhrel siam ringawt chuan kentel tam tak aneih avangin ngaihtuahna tam tak sen a ngaih thu sawiin, Health Department hnuaiah hna hrang hrang ruak post  734 te kum thar lama  lak theih tura beisei niin, hmathar tam tak lak tawhna Zoram Medical College tihchangtlung zel kawngah pawh theihtawp chhuah anih dawn thu a sawi bawk.

Khuallian chuan Sawrkarin mipuite hriselna leh inekawlna lam a ngaihpawimawh thu pawh a sawi a. October ni 1 atangin Mizoram State Health Care Scheme chak taka buaipui anih thu leh  inziahluhna man  BPL chhungkaw tan cheng  100 leh BPL nilo tan cheng 1000 anih thu sawiin, kum khatah  mipakhat tan cheng nuai 2 thleng a thlawna inenkawl theihna tur ruahmanna siam  a ni, a ti a. Sawrkarin mirethei leh mamawhtute harsatna hrereng chungin thisen sawngbawlna man Blood Processing Fee a ti tawp a, damdawi tlanglawn  angte pawh Damdawi In leh ruat bik hmunah mamawh angte hmuh tur a awm a ni, a ti a. Dr R.Lalthangliana chuan North East State-a   Cancer enkawlna hmun tha leh changtlung ber tur Cancer  Superspeciality Hospital, cheng vaibelchhe 500 senga sak mai tur  JAICA nena thawkhoa din tum anih thu leh  RIPANS tihchangtlun nan   sawrkar laipuiin  cheng vaibelchhe 480 lai a pawmpui thu a sawi a. Minister chuan mizote chu zirna lama tanlak  angaih thu sawiin,  ziak leh chhiar thiam chauh nilo chhawr tlak tak tak kan mamawh thu leh India ram inelna huang thlenga hlawhtlinna chang thei kan inchherchhuah a ngai tak zet ani, a ti a.  Kum zabi sawmhnih pakhatna chu  inelna khawvel, hnatam tak awm chung pawha thiam filawr leh  chhawrtlakte   khawvel anih avangin,  dingkhawchhuak ve tur chuan   kan insiamrem angai a ni, a ti a.  Minister chuan mipuite chu hmasawnna hmanraw neihte anih dan ang tur taka hmang tura chahin,  anih dan ang taka hmanruate hman aniha,   sawrkar programme-te kalpui anih chuan kan ramin a hlawkpuiin a hlawhtlinpui thei dawn a ni a ti bawk.

Khualzahawm Dr ZR thiamsanga chuan Mizoram sawrkarin Health sector ngaipawimawhin hun rei lo te chhungin hmasawnna ruhrel mamawh hrang hrangte tihlawhtling a ni, a ti a.  Champhai mipuite mamawh hriaa hmanraw tha chhawpchhuahsaktu Chief Minister leh Health Minister chungah lawmthu a sawi a. Tun hma ngaihtuahin Champhai District Hospital-in bung thar kaiin nasa taka hma a sawn thu a sawi a. Health and Family Welfare Vice Chairman chuan sawrkarin Socio Economic Development Policy (SEDP)  hmangin Board 14 din a ni a,  project based a hmasawnna hrang hrangah  hmalak tum niin, ei leh bar intodelh a eizawnna ngelnghet nei thei tura tanlak tum a ni, a ti a. Mizoram State Health Care Scheme  Corpus-ah cheng vaibelchhe  202 leh hman chawp mai theih tur cheng  vaibelchhe 20  a awm thu sawiin,  Golden Card leh Mizoram State Health Care Scheme kalkawp theih  dan kawngte pawh dap mek zel a ni, a ti a. Thawktute chu Damdawi In chu taksa, rilru leh thlarau damna ni thei tura siam tum tur leh zaidam leh hmangaih taka damlote enkawl thin turin a chah a. Mipuite pawh thil nihna tak  hrechiang hmasa lova hriselna lama thawktute dem ngawt lo tura ngenin, Clean Beautiful and Healthy Champhai District siam tura tanlak puiah a sawm nghal a ni.

Hawnna hunah hian Dr. T.Lalhmangaihi, Director, Directorate of Health and Medical  Education chuan kalkhawmte lawmna thu a sawi a. Dr Zonunsiama, Nodal Officer, Directorate of Health and Medical Education-in technical report a pe a. Dr Zatluanga’n, DMS Champhaiin lawmthu sawina neiin hun a khar a ni. He hunah hian Pu C.Ramhluna, Vice Chairman, Industrial Development Board; Pu J.Hmingthanmawia, Director, Commerce & Industries; Pu S.L Naveen, DC Champhai; Dr Vanlalsawma, Joint Director, DHS; Er K.Zodingliana, Joint Director, H&TE; Sawrkar Official; College Zirtirtu leh Zirlai bakah khawtlang hruaitu leh mipuite an tel tha hle a ni.

Dialysis Room-ah hian khawl   pahnih a awm a, pakhat man hi Rs 7,84,000/- niin, Rs 15, 68,000/- sen a ni. RO Plant hi Rs 16,81,500 seng a siam a ni bawk a.  Square Feet 895.77 a zauah bunfel niin, Dialysis Unit, RO Plant , Nursing Station, Changing Room leh mamawh dangte a awm a. A cheibawlnan  hian   Rs  7,39,600 hman niin senso zawng zawng chu  Rs 42,38,608/-  a ni a, Funding agency hi NEDP a ni. High Dependency Unit (HDU) hi CSS kaltlanga siam trauma center kentel pakhat niin,a zauh zawng hi Square feet 731.73 niin, hmanraw hrang hrang leinan Rs 37,29,286/- sen niin,  khum panga a awm a,   avaiin Rs 41,21,286 /-  sen a ni.