No.1693/2020-2021

Vawiin khan Health & Family Welfare Minister Dr. R. Lalthangliana'n Zaingen YMA Hall, Taidawnkawn-ah Khawzawl District Level Task Force meeting a neihpui a. Minister hi Khawzawl Bawrhsap Pu H.Lianzela'n lo dawngsawngin he hun hi a kaihruai a ni.

Minister Dr. R. Lalthangliana chuan thu sawiin Kum 2019-a District thar pathum piang zinga pakhat Khawzawl District-ah hun tha tak Khawzawl Bawrhsap hmalakna a neih a nih chu lawmawm a ti a. COVID-19 hripui leng dona kawnga Khawzawl District chhunga hmalatute fakawm a ti a.

Minister chuan tun hnaia Mizoram mi leh sa tangkhang lo haw lai hian chi-ai lo a, fimkhur leh dawhthei taka mitin te awm turin a ngenin a sawm nghal a. Khawzawl District chhunga Medical Officers lokal ten an awmna theuh VLTF te fimkhur taka hma la zel turin lo ngen leh se, tiin a chah nawn leh a. Minister chuan COVID-19 kai theihna hmun te thliar thiama, theihtawpa inthlahdah lova awm reng turin DLTF te a chah bawk a ni.

Minister Dr. R.Lalthangliana chuan Khawzawl, Hnahthial leh Saitual Hospital ah thawktu mamawh zual 30 theuh lak a ni ang, tiin a sawi a. Hei bakah hian District Hospital a hman tur Ambulance thar pawh Sawrkarin a ngaihtuah sak ang, tiin a sawi ni. Khawzawl Hospital-ah Ultrasound, Endoscopy khawl dah sa enkawl turin a ranglama technician dah a nih tur thu leh a khawtual mite an awm phei chuan ngaihpawimawh an ni ang, tiin a sawi a, Minister hian Khawzawl Bawrhsap hnenah PPE, Sanitizer bawm 80, N95, 3 layer Mask, Bleaching Powder a hlan nghal bawk a ni.

Khawzawl Addl. DC Pu Paul L.Khuma'n DLTF, VLTF, Medical Officers te hmelhriattirna neih pahin Khawzawl District in COVID-19 dona kawnga hmalakna hrang hrangte PowerPoint Presentation a nei a ni.

Khawzawl District Hospital-ah khum 20 buatsaih a ni a. Khawzawl District-ah hian COVID-19 do nan NSS, NGO leh mimal volunteer 292 an in register tawh a. Lockdown tirh atangin Khawzawl District chhunga hnathawk tangkhang 334 an awm a, a tam ber chu Jharkhand leh Bihar state atangin an ni a, tun dinhmunah hnathawk tangkhang 184 an awm a, a tam ber hi kawngsiam leh company a inhlawh te an ni. Khawzawl mi leh sa, District-a lo haw tawh zawng zawng hi 238 an ni a, heng zingah hian hmeichhia 158 (66.3%) leh mipa 80 (33.7%) an ni. Delhi tih lohah chuan Karnataka, Tamil Nadu atanga lo haw an tam ber a ni. Khawzawl District-ah hian Quarantine Centres 26 awmin mi 530 awm theihna tur Khawzawl Bawrhsap kaihhruaina a buatsaih a ni a. Tun dinhmunah mi 187 Quarantine Centres hrang hrangah an awm mek a, lo thleng leh tur Uttar Pradesh atangin mi 3 leh Haflong atangin mi 2 beisei mek an ni.

Khawzawl District in COVID-19 do nan hmun 64 ah VLTF duty mi 120 atanga 140 vel lockdown chhung khan an awm a Police duty hmun 6 ah an awm bawk a ni. Khawzawl District entry point-atan Kawnzar Entry Point siam a ni a, hetah hian lut chhuak zawng zawng chhinchhiah an ni a, Zonal officers 9 ten an zone theuh te nitin daily inspection leh report dar 3 hma in DC office ah an submit thin bawk a ni.

Khawzawl hi 2011 Census ah Population 36000 vel an ni a, Mizoram Population atanga 3.1% vel niin, District literacy rate hi 93.51% a ni.

He meeting hi Dr. Lalngaihawmi Chhangte MO in lawmthu sawiin a khar a ni.

Meeting zawh hian Minister Dr.R.Lalthangliana chuan Vengthar Presbyterian Kohhran Hall Quarantine Centre a tlawh a, Kohhran hrang hrangte hnenah Quarantine Centre enkawl nana hmantur sum a pe theuh bawk a ni.

Hemi hnu hian Minister chuan Khawzawl District Hospital hmunhma tlawhin, thawktuten an mamawh leh harsatna an neihte Minister hnenah hian an thlen a, Minister chuan an mamawh leh harsatna te chu a ranglama ngaih pawimawh a nih tur thu a sawi a ni.