Health & Family welfare, Higher & Technical etc. changtu Minister Dr. R.Lalthangliana chuan vawiin khan Kolasib District Hospital leh Govt. Kolasib College a tlawh.

Health Minister hian Kolasib Damdawiin leh Govt Kolasib College a Building/Block hrang hrangte fang kual in, helai hmuna thawkten harsatna leh mamawh an neih chungchangah inkawmhona hun an hmang a, Staff leh infrastructure lama mamawhna awm te chu theihtawp a chhuahpui tur thu a sawi. Minister chuan Kolasib District hospital ah damlo awm zat chu tam a tih thu tarlangin  thawktu bakah Doctor leh Khum te pawh an mamawh belh thu a hmunah a hmuhpui ani tiin Building sak that ngai chungchangah te pawh hma an lak chhoh zel tur thu a sawi a ni.

Hemi bakah hian Govt. Kolasib College a Building sak mek te pawh tlawhin thawktu te nen inkawmhona hun an hmang a. Stream thenkhat a zirtirtu indaihlo thu an thlen te chu a hriatthiam pui thu sawiin tunlai khawvelah ah Science zirna te chu ngaih pawihmawh a tul a, zirna boruak tha zawk a awm theih nan Library tihchangtlun, thingtlanga Zirtirtu quarters sak te bakah Mizoram mamawh tur kalphung te chu zirchian a ngaih thu a sawi bawk.

FCS&CA, LAD etc changtu MoS Pu K Lalrinliana chuan Health Minister in Kolasib Damdawi in leh College te tlawh a, a hmun ngeia an an harsatna tawh te bakah an thil mamawh te endika a zirchian avangin lawmawm a tih thu sawiin Sawrkar in Kolasib District Mipuite mamawh te chu a ngaituahsak ngei a rin thu a tarlang bawk a ni.

Minister hi MoS leh kolasib Bialtu MLA Pu K Lalrinliana, 6-Serlui A/C bialtu MLA Pu Lalrinsanga Ralte, Dr.H Lalchungnunga, Director Health Services bakah Sawrkar Official dang ten an tawiawm a, NEC leh NEIGHRIMS hotute nen inkawm hona nei turin vawiin chawhma khan Shillong a pan nghal a ni.