Vawiin khan Sports & Youth Services Minister leh Vice President, Mizoram Bharat Scouts & Guides (MBS&G) ni bawk  Pu Robert Romawia Royte chuan Mizoram Bharat Scouts & Guides (MBS&G) in City Park a World Thinking Day 2019 an buatsaih chu khuallian niin a hmanpui.

Sports & Youth Services Minister Pu Robert Romawia Royte chuan tunlai khawvel ah ngaihtuahna dik, tha leh fel in zirtir a pawimawh a, Scout Movement in hetiang Ni pawimawh an ngaihtuah chhuah kha a ropuiin a finthlak hle a ni, a ti a. Negative thinking ngaituahna diklo kan tih mai nei ram leh mipui chu an beidawng thin a, chutiang ramah hmasawnna a thleng ngai lova, khawvel a civilization ropui tak tak te pawh ngaihtuahna dik lo leh ruahmanna fel lo avangin an tluk chhiat phah a ni a ti. Ram hruaitu te zingah ngaituahna dik leh tha, positive thinking neih a pawimawh thu sawiin chutiang nei hruaitu chuan ramah changkanna an thlenin, an hnam leh an mipui te hma an sawn thin a ni, a ti a. Midang thil tha tih sawi chhe reng leh negative thinking lam hawi thu leh hla social media a tam chu pawi tiin hetiang hi Mizo society in kan hnualsuat a, kan value system a tha zawnga her rem a hi thil tul tak a ni a. Mi kan ngaihsan zawng thlak a tul a, mi taima, mi thawkrim leh mi rinawma te hi kan ngaihsana an hun tawh a, chutiang turin kan ngaituahna hi kan her a ngai, ani a ti.

Mizoram Bharat Scouts and Guides chuan an thil tih leh tum atangin hruaitu tha chherchhuahna kawnga hna ropui tak an thawk a ni tiin thalai leh naupangte nakina ram hruaitu leh hnam tana chhenfak awm la ni tur te chu hruaitu tha ni thei turin zirtir zel turin a chah a. Sawrkar tharin hmachhawp tam tak a neih tih sawiin chung zinga chuan Sports Policy chu duan mek a ni a, Mizoramin National Games a discipline tam zawka lawmman kan lak theih nan Mizoram State Games chu Sawrkar tharin neih ve a tum a ni, a ti a. Mizoram chu India a state fit ber leh Mizote chu hnam fit ber kan nih theih nan hma la in hna kan thawk dawn a, hemi atan hian Fitness Day te pawh kan la puang dawn a ni, a ti bawk.

Minister hian State Awardees 2018 a chawimawina hrang hrang dawng te hnenah lawmpuina thuziak a hlan bawk a ni.

World Thinking Day 2019 ah hian Pu Zothanmawia, State Chief Commissioner, MBS& G leh Director, Sports & Youth Services chuan thu hmahruai sawiin World Thinking Day lo pian chhuah dan chu Pu Lalrambuatsaiha, Asst. State Commissioner(S) MBS&G in a sawi a. Pi Saizampuii, State Secretary chuan MBS&G hnathawh leh an pawl kal dan ngaihtlak a ni a, Pi Boichhingpuii, Vice President, MBS&G in lawmthu sawiin programme a khar a ni.

Scout Movement hi Mizorama 1932 khan tan niin tunah hian Mizoram pumah Scouts 2316 leh Guides 2705 an awm mek a ni. World Thinking Day hi Scout Movement tantu Lord Baden Powell ah pianchham ani a, amah chawimawi nan he ni hi hetianga ruat a lo ni.