Vawiin hian Tawi tlang Block Mizo Hmeichhe Insuihkhawm Pawl (MHIP) te chuan Block Conference vawi 9 na, Thentlang khuaah an hmang a. Bialtu MLA leh Deputy Speaker, Er. Lalrinawma chuan khuallian niin a hman pui.

Conference nana sak pandal, Darpawngi Run an vuahah vantlang inkhawm, Pi R. Lalpekliani, MHIP Block President kaihhruaia neihah Khuallian hian thusawiin, Tuikum bial mipuiten a term hnihna atana an thlan tlin leh avangin lawmthu a sawi a. Tha taka hna a thawh theih nan an tawngtaipuina dilin, an tan thurawn pek leh thil tula biak theih reng a nih thu a hrilh ani. Er. Lalrinawma chuan, fa enkawl seilian tu ber chu nu bawk hi a nih avangin nu te hi thangthar lo awm zel te dintu in ni, a ti a. Ka fateah hmeichhiate himna leh lainatna kan tuh tam chuan a tha zawngin khawtlang nunah hna a thawk ngei ang. Tin, hmeichhiate ngaihhlut apiang hi vantlang ngaihhlut a ni ber a, hman ata tun thlengin hmeichhiate ngaihsan hna leh nihna te umin mipate hian kan bei thin a ni. Chuvang chuan ngaihsan tur dik in ngaihsan chuan kan ram hian kawng dik a zawh zel dawn a ni, tiin an pawimawh zia hre reng turin a ngen a. Pasal fanaute Pathian lama hruaitu nih tum turte, an tana tawngtai taima hle tur tein a chah a ni.

He hunah hian Pi Saipuii, President, MHIP General Hqtrs chu khualzahawm ani a. Khualzahawm hian Conference thupui ; "Hmeichhiate leh naupangte hmasawnna leh himna atana nasa taka tan lak" tih thu hmangin thusawina hun a hmang a. Pi. Lalsiampuii Tochhawng, Serchhip District Child Protection Officer chuan naupangte himna chungchang sawina hun a hmang bawk. Hengte bakah hian an member boral mi 31 te sunna hun te, MHIP chanchinbu, Run Lum campaign te leh thusawi dangte leh intihhlimna hun te an nei bawk ani.

He Conference hi nimin atanga tan tawh niin nizan lamah pawh palai lawmna inkhawm te Pandal ah buatsaih ani tawh a. Vawiin hian Pandal ah vek vantlang inkhawm hi buatsaih leh niin zaninah pawh vantlang inkhawm hi neih leh tur a ni ang a, a tiak zui tawh dawn ani.