Mizoram-a State Level Sports Association 32 inhlawmkhawmna pawl United Sports Association of Mizoram (USAM) hruaitute chuan vawiin chawhma dar 10:00 khan a Office Chamber, New Capital Complex-ah Pu Robert Romawia Royte hmuin, Sports Minister hna a chelh vanga lawmpuina thuziak an hlan. 

Sports Minister Pu Robert Romawia chuan Mizo infiammiten Incentive Cash Award an lak thin, kum engemaw zah nghah ngai thin chu a rang lama pek zel a nih theihna tura hmalak a tum thu te, Sports Policy neih thuai tum a nih thu leh Mizoram Sports hmasawnna tura Education Department leh Sports department tha taka an thawhho theihna tura chak taka hmalak mek zel a nih thu a sawi a. Heng bakah hian USAM hmalakna kal mek, Mizoramin Sports Authority (SAI) centre puitling kan neih ve theihna tura Central sawrkara an lo thlen tawh chak zawka bawhzui leh infiamna khawmpui lian zawk thleng zo thei tura sports complex tha tawk tak neih ve te chu Mizoramin a mamawh leh hmachhawp a nih thu a sawi.

USAM hruaitute hi President - Lallianthuama; Sr.Vice President Vanlalsawma; Gen.Secretary Brian Lalnunhlima; Jt.Secretary Lalduhkima Sailo leh Treasurer Lalthakimi te an ni a. Mizoram Sports hmasawnna tura an ngaih pawimawh leh hmalak mek dan te, Sports Minister leh Sports Association hrang hrang te tha taka thawhho theih an beisei thute Minister hnenah hian an thlen a. Sports Minister chuan USAM hmalakna fakin tha taka thawhhopuiah a sawm a ni.