No.66/2021-2022

Aizawl, the 9th April 2021: Vawiin khan Dr R.Lalthangliana, Minister, Health & Family Welfare, Higher & Technical Education leh Commerce & Industries chuan Saitual khua a tlawh a. District thar tihchangtlunna atan sawrkar hmalakna kal mek zela District Hospital tihchangtlun dan tur te, Chief Medical Officer's Office sakna tur hmun te, Govt Saitual College-a building block sak thar te, Saitual Market sak mek te, KVI hmuhma thar tur te a endik a ni.

Dr R.Lalthangliana chuan Saitual District Civil Hospital a tlawhnaah hian tunhnaiah World Bank atanga Mizoram sawrkarin Mizoram chhunga health system tihhmasawnna atana pawisa tam tam tak Rs 28,400 Lakh(32 Million USD) a hmuh dan te a sawi a. Hei hian Mizoramah hriselna kawngah hmasawnna nasa tak a thlen dawn a. A bikin thingtlang lamin hemi sum atanga hmalakna hi an tel nasa zual dawn a ni a ti. Health Minister chuan District thar pathum chhunga CMO office te sakna tur pawh World Bank atanga pawisa hmuh hmanga ruahman fel a ni tawh tih a sawi a. CMO, Saitual District atan pawh Rs 4 Crore ruahman a ni a, hnathawh tan thuai tum a ni a ti. District thar pathuma District Hospital te pawh a nih dan tura tihchangtlun thuai a ni dawn a; Medical Superintendent te pawh ruat tum a ni a, staff pawh a theih dan kawng dapa indahbelh tum a ni a ti.

Tunkar chhoa COVID-19 hrileng rawn pung thar leh thut(Covid-19 second wave) avanga India ram state 18 chuang an buai takzet tawh thu a sawi a. Prime Minister pawhin State hrang hrangte chu Covid-19 thawhkhatna ai khan tun - a thawhhnihna rawn leng lehah hian nasa zawk fea fimkhur turin min chah tih Health Minister Dr R.Lalthangliana chuan a sawi a. Vaccine pawh tun aia chak zawka pek chhuah tum mek a ni a ti.

"Tuna Covid-19 hrileng rawn thawk leh meka hi mithiam ten a hma mi aia hlauhawm zawkah an ngai a, a veitu tam tak te pawh ICU-ah awm rei hman loin an thi deuh nual tawh niin a lang a. Insawi thaihna lam pawh ni loin he hrileng lakah hian kan fimkhur loh chuan kum khat chhunga fimkhurna kawnga kan insumtheihna leh kan thawhrimna te kha zankhat thil thuah engmahloah a chang thei a ni", a ti. Health Minister chuan mipuite him zawk nan tun aia inkhuahkhirhna khauh zawk te pawh siam a la tul dawn a. Inkhawm leh mipui vantlang puipuna kawnga kan zalenna hman mek te hi kan lo him zawkna tur ngaihtuahin la khap leh te pawh a tul dawnin a lang a. Hemi chungchang hi Kohhran Hruaitute leh Tlawmngai Pawl hrang hrang te nen pawh tunhnaiah sawiho a ni tawh a ni a ti a. "Mipui te pawhin kan thuawih avanga state dang te aia kan him zawkna te kha hre reng ila. Sawrkarin SOP leh mipuite zawm tur thil a rawn siam apiang te thuawih taka zawm theuh leh turin kan insawm a ni", a ti.

Dr R.Lalthangliana chuan Saitual College Building sak thar te pawh a endik nghal a. Principal Office-ah inkhawmna tawi neih a ni a. He hunah hian zirna in leh hmun hma tha zawk sawrkarin sum tam tak senga a siam te tha taka vil a ngaih thu Minister chuan a sawi a. A pawimawh ber erawh Zirtirna tha(Quality Education) hmanga zirlaite - chhawrtlak leh mi puitlinga chherchhuah hi englai pawhin a ni zawk a ni a ti.

Saitual Market Building, Saitual Chhim Veng, Rs 150 lakhs a sak mek te pawh a endik a. Hemi hnu hian Saitual KVI sawnna tur, Tamdil kawnga mi pawh a thlawh nghal a. Tuna Saitual KVI awm mekna chu Sawrkar chuan DC Office Complex, Saitual District awmna atan a buatsaih mek thung a. DC Office tur pawh sak tan mek a ni. Helai pawh hi Minister chuan a tlawh tel bawk a ni.

Pu C. Ramhluna, Vice Chairman, C & I Development Board, Pu Lalthanliana, Chairman, KVI Board, Pi Esther Lal Ruatkimi, Commissioner, H & TE and C&I Deptt., Pi Nazuk Kumar, Director, H & TE Deptt., C & I Development Board hotute, Pu H.D. Lalrintluanga, Addl. Director, C & I (Commerce) Deptt.,Dr. C. Lalzepuii, Joint Director(Planning), DHS, Dr. PC. Lairamliana, Joint Director, DHME, Pu Malsawmsanga, Dy Director, I&PR leh official ten Aizawl atangin an zui a. Saitualah hian Pu VL Hruaizela Khiangte, Bawrhsap, Pu Zarzoliana, Addl SP, Saitual leh Official dang ten an lo tawiawm thung a ni.