Kum tinin Mizoram-ah February thla tir lama hman thin kangmei ven hapta ‘State Level Fire Prevention Week’ chu vawiin khan Synod Conference Centre, Aizawl-ah Health & Family Welfare Minister Dr.R.Lalthangliana’n a hawng a. He hunah hian Evironment, Forests & Climate Change Minister Pu T.J.Lalnuntluanga chua Khual zahawm a ni bawk a; PCCF & Member-Secretary, State Level Fire Prevention Committee Dr.Ch.M.Rao, PCCF (CAMPA) Pu Liandawla, APCCF & State Mission Director (State Bamboo Mission) Pu Lalthangliana Murray, EF&CC, Police leh sorkar department officials bakah ramngaw/nungcha humhalhtu NGO aiawh engemawzat an tel.

State Level Fire Prevention Week hawnna inkhawmah Khuallian Dr.R.Lalthangliana chuan Hriselna leh Environment humhalh nana kawng pawimawh 3 inang a awma a hriat thu a sawi a, chung chu - invenna (preventive), tihdam lehna (curative) leh tihchangtlun (promotional) a ni a, chung zinga pawimawh ber chu inven lawkna a ni, a ti. Mizoram chu Mizote ram tana Pathianin ruat a ni a, hei loh hi ram dang a pe lova chuvangin tatu rilru tak tak nena mawhphurhna lak ngamna ‘economic nationalism’ hi Mizo rilruah tuh a pawimawh hle a, hei hian sorkar pawh a khalh ngil mai dawn a ni, a ti bawk. Forest Suvey of India Report (2017) chuan Mizorama forest area 531 sqkms hloh belh a nih thu a tarlang chu a vanduaithlak hle a, India ramchhunga lui lian 90% tui chu bawlhhlawh ‘polluted’ a ni tawh tih a sawi bawk. ramchhung hmun dangte ngaihtuah chuan Mizoram chu ramngaw la ngah tak, tui leh boruak pawh la thianghlim hle a, amaherawhchu fimkhur taka venthat a nih loh chuan hloh vek theih a ni tiin Minister chuan hmanlai pipute tih thin dan tam tak, tunlai khawvela hman tlak tawh lote chu kalsan a tul pawha kalsan ngam tur a ni, a ti. Mipuite hrilhhriat kawngah tunlai changkanna smartphone leh social media te hmang tangkai thiam turin kalkhawmte a chah a, Mizorama NGO lian leh Kohhran te pawhin environment humhalh kawnga sorkar hmalakna chu theihtawpa thlawp turin a sawm bawk. Mizo Kristiante chuan khawvel leh a chhunga thil awm zawng zawngte chu Pathian siam vek a ni tih kan hria a, mihringte chu thilsiam dang zawng zawng hotu/enkawltu ‘guardian’ atan ruat kan ni tih i hre reng ang u tiin kangmei laka inven kawngah taimak chhuah theuh turin Mizoram mipuite a sawm bawk a ni.

Khual zahawm EF&CC Minister Pu T.J.Lalnuntluanga chuan ramkang venna atana sorkar hmalaknate zawm a pawimawh thu sawiin The Mizoram (Prevention & Control of Fire in the Village Ram) Rules, 2001-ah pawh Village Council-ten ram a kan loh nana hma an lak an tur leh hremna an lekkawh theih dan tur tarlan a ni, a ti. Ramkang avangin tuihna a chat a, a bawlhhlawh phah thin a, nungchaten an tuar em em bawk avangin a ven leh thelh hi mi zawng zawng tih tur (duty) a nih thu a sawi a. Ram tikang lo tura hmalak leh midangte zirtir kawnga mitin hi palai ‘ambassador’ kan ni theuh a ni a ti a. Green India Mission atangin Mizoram chhunga ‘green area’ tam tak siam belh tum a nih thu a sawi bawk.

PCCF & Member-Secretary, State Level Fire Prevention Committee Dr.Ch.M.Rao chuan ramkang laka inven nana EF&CC Department hmalakna hrang hrangte a tarlang a. Kumin Fire Prevention Week Thupui-ah ‘Ram tikang lo turin mi tin i fimkhur ang u’ tih vuah a ni a, District zawng zawngah DC te hriattir ni tawhin tunkar chhungin District level-ah pawh hmalak a nih tur thu a sawi. Heng bakah TV leh radio-ah te live discussion leh talk show te huaihawt a ni a, chanchinbu leh social media-ah te pawh a theih anga tam mipuite fimkhur tura inzirtirna lam hawi thuchhuah a nih thin bawk tih a tarlang a ni.

Vawiin Fire prevention Week hawnna inkhawmah hian thuchham ‘PLEDGE’ sawirual a ni a, APCCF & State Mission Director (State Bamboo Mission) Pu Lalthangliana Murray kaihhruaina hnuaia kalkhawmten a hnuaia mi ang hiam thu an chham a ni :

“Mizoram hi Siamtu Pathianin Mizo zawng zawngte tana min pek a ni tih leh he ram hi khawvela kan ram neihchhun a ni tih ka pawm a; Mihringte leh thilsiam dang tinrengte hi engemawti talin kan inzawm a, inkungkaihin kan in mamawh tawn vek a ni tih ka pawm a; Ramkang hian thing leh mau leh ramhmulte bakah nungcha tam tak tiboralin tui in tur min petu tuihna a titlem a, hei hian mihringte tan harsatna tam tak min thlen a ni tih ka pawm bawk a; Chuvangin vawiin ni atang hian India khua leh tui ka nihna ang leh Mizoram neitu ka nihna angin kan ram thing leh mau leh nungcha chi hrang hrangte hi duat taka enkawl a, humhalh tur leh ram tikang lo turin ka intiam tlat a ni tih ka puang e.