Vawiin khan MJA Press Club ah Mizoram sorkar buatsaih, Press Study Tour State hrang hrang pali-a kal Team hrang hrangte hnen atangin report ngaihthlak a ni a. Pu Lalruatkima I&PR Minister leh I & PR Department Officer te leh MJA hruaitu leh member ten he programme hi an hmanpui

Press Study Tour-a kal te hi Nagaland atangin Pu Zohmingmawia Aizawl Post chuan report a pe a, Kolkata Team atangin Pu A. Zotinkhuma Zoram Voice, Sikkim atangin Pu R. Lalhmangaihzuala Romei leh Meghalaya Team atangin Pu Ramdinsanga Zozam Times ten report an pe a ni.

Report ngaihnawm leh hlawkthlak tak ngaihthlak a ni chu lawmawm a tih thu leh, kan thenawm State atanga zirtur kan neih zira kal Journalist ten kan ram tana thil tha tak tak an zirchhuak chu lawmawm a tih thu leh  , Press Tour buatsaih chhan hlawhtling taka hman a nih vangin lawmawm a tih thu I&PR Minister Pu Lalruatkima chuan a sawi  a.

Minister chuan, heng atang hian chanchinbumite pawimawhna a lan thu sawiin, an hamthatna tur leh pension chungchangte siam turin sorkar a inbuatsaih tih thu leh MJA Welfare Board atan MJA leh sorkar lam pawh an inruat fel tawh tih sawiin Tourism Industry chungchangah uar zawka mipuite hnena zirtirna pe turin a chah a, NEIGHRIMS Shillong-a khualbuk hmunhma pawh a theih anga hmalak a nih tur thu te, chanchinbumite chu sorkar fin chhuah zel tur leh sorkar nena thawhhona tha tak nei zel turin a sawm a ni.

Pi Lallianpuii, Joint Director I & PR Department  Department chuan  Ram leh Hnam tana feh chhuahna State dang atanga an thil hmuh leh hriat atanga thurawn hrang hrang an neih te chu zir chian tham anih thu leh State thenawm mai nilo hmun hla zawk te pawh la kal theih a beiseiawm thu sawiin hlim leh dam tlanga Press Tour member te an lo haw thleng chu lawmawm a tih thu leh thu dang tangkai tak te a sawi .

Programme kaihruaitu Pu Zonunsanga Khiangte, President MJA,  chuan hun kal tawha Press Tour lo kal chhohpui tawh dan leh tun dinhmun te a sawi  a. Member thenkhatte pawhin an tawnhriat hrang hrang te an sawi bawk a ni.