Vawiin chawhnu khan Chief Minister’s Conference Hall-ah HDFC Bank bultum Mobile Blood Donation Van chu Health Minister Pu Lal Thanzara hnenah hlan a ni. He Van hi Model Blood Bank, Civil Hospital-a hman tura pek a ni.

Pu Lal Thanzara chuan hriselna kawnga thawktute an pawimawh rualin thisen petu (blood donor) te an hlu a ni tiin thisen pekna leh  vawnthatna lirthei Health Department-in an neih theihna atana HDFC Bank hmalakna ah lawmthu a sawi a. He Van hi kawng thatloh vanga thisen pek chungchanga buaina tawk te chhawk zangkhaitu anih ngei a beisei thu a sawi a. Health Minister chuan India hmarchhak state zingah Mizoram chuan Blood Bank changtlung tak kan neih thu tarlangin, Association for Voluntary Blood Donation (AVBD) pawhin Van hi an tangkaipui bakah thisen petu an tam belh zel a beisei thu a sawi. State Referral Hospital, Falkawn leh Mizoram State Cancer Institute-ah te Blood Bank changtlung tak neih a nih theihna atan hmalak anih thu Pu Lal Thanzara chuan a sawi bawk a ni.  

 Mobile Blood Donation Van cheng nuai 28 chuang man hi duanchawp niin Mizoram-a thisen pekna leh vawnthatna awm kawp lirthei hmasa ber a ni a. Khum pahnih awmin thisen vawnthatna (Blood refrigerator) unit 120 vel leng a awm a, Dual AC system, Mini fridge, LED TV a chhung leh pawnah dah a ni a, PA system leh a chungah retractable canopy te a awm bawk a ni.

He hun hi Aizawl Civil Hospital Medical Superintendent Dr.K.L.Remsanga chuan kaihruaiin  Pu John Varte, HDFC Bank chuan technical report a pe a. Dy. Medical Superintendent Dr. John Zohmingthanga chuan lawmthu sawina in hun a khar a. HDFC Bank, Health & Family Welfare Department, MSACS, AVDB leh I&PR aiawh te an tel a ni.

Tun dinhmunah hian Model Blood Bank, Civil Hospital Aizawl-ah thawktu mi 34 an awm a, nitin thisen unit 70-80 pekchhuah thin niin voluntary donation hi 83.6% a ni a. Service hi engtiklai pawhin (24x7) kalpui a ni.