Tukin zing dar 6:30 khan Health & Family Welfare buatsaih World Population Day 2017 chu Vanapa Hall kawtah hman a ni a, Health Minister Pu Lal Thanzara chu Khuallian a ni. He Ni puala Rally chu Khualllian hian a vailiam nghal a.  Tunkum atana he Ni thupui chu “Beiseina Thar, Hmasawnna Thar” tih a ni. 

Pu Lal Thanzara chuan World Population Day 2017-in a tum ber chu Nu leh Nau hrisel zawkna atana beiseina leh hmasawnna thar neih anih thu sawiin, he hmasawnna hi chhungkaw ruahmanna tha atanga thleng thei anih thu a sawi a. Mizoram-ah kum 2016-2017 chhungin Nu, nauchunga thi 20 awmin nausen 300 chuang thi an awm thu leh, nu leh nau thihna tam zawk chu naupang lutuka fa neih te, chhang zing lutuka nau pai te leh hriselna nghawng khawpa fa neih tam vang te anih thu tarlangin hemi atang hian Nu leh Nau hrisel tawk loh zia langchiangin chhungkaw ruahmanna tha kan mamawh a ni , a ti a. Health Minister chuan Nu leh Nau hriselna hi chhungkaw hmasawnna atan a pawimawh ani tiin kalkhawmte chu hemi kawnga hmahruaitu ni turin a chah bawk a ni. 

World Population Day hi kum tin July Ni 11 ah hman niin Mizoramah chuan kumin atangin thla khat chhunga hman tura ruahman a ni a. Mobilisation Fortnight (June 27-July 10) leh Population Stabilisation Fortnight(July 11-24)-a then a ni a. Population Stabilisation Fortnight chhung hian Sawrkar damdawi in tinah indanna chi hrang hrang a thlawnin a lak theih a ni. 

National Health Mission Director, Dr.Lalrozama chuan he hun hi kaihruaiin Dr. Hmingthanmawii SPO, Reproductive & Child Health, H&FW chuan lawmthu sawina in hun a khar a. Rally hi Vanapa Hall atanga Zarkawt Recreational Centre thleng neih a ni.