No.6/2021-2022

Aizawl, 1st April, 2021 : Vawiin chawhnu khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 hri leng dinhmun thlirhona neih a ni a. Meetingah hian Home Minister Pu Lalchamliana, Medical Operational Team Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah DM&R, Home, Health, I&PR department hotulian te leh Aizawl DC bakah Contact Tracing Team, Indian Medical Association, Mizoram Kohhran Hruaitute Committee (MKHC) leh Joint NGO Coordination Committee aiawh te an tel a ni.

Vawiin review meeting chuan India rama COVID-19 second wave lo hluar leh mek chungchang thlirin COVID-19 variant thar hi a hmaa COVID-19 hri leng aiin 70% laia inkaichhawn awl a nih avang leh a ziarang diktak mithiamte pawhin an la hriat kim theih loh avangin Mizoram chhunga chengte pawh a hma aia kan fimkhur lehzual a ngai hle a ni, an ti a. Lo thleng lo tura theihtawp chhuah a tul rualin he second wave hi hmachhawn tura kan theih ang chinah kan lo inbuatsaih a ngai a, State dangte pawhin an lo inthlahdul tawhna te sutin a hma angin khauh lehzual zawka an kal meklai hian mipuite pawhin awmhmuna kan tih ve theih COVID appropriate behaviour - Mask vuah that, kut silfai uluk leh social distancing bakah sawrkarin inkaihhruaina a siam Standard Operating Procedure (SOP) te a hma aia uluk lehzuala kan zawm a ngai a ni, an ti a. Kan hun tawng azirin SOP te pawh a tul chuan siamthat leh a ngai dawn a ni, an ti.

Hriat theih chinah COVID-19 variant thar hi Mizoramah a lo la thleng lo nia a lan rualin, tunah hian Mizorama COVID-19 positive hmuhchhuahte sample 200 phai lam laboratory lianah endik tura thawn leh mek a nih avangin kan dinhmun diktak a la hriat loh a nih thu meetingah hian tarlan a ni a. COVID-19 variant thar (new strain) hi thalaiten an kai awlsam lehzual nia hriat a nih avangin leh thihpui zingah pawh thalaite a hma aiin an tam zawk avangin chetvelnaah thalaite pawh fimkhur lehzual turin an ngen a, COVID-19 vanga inkharkhip leh inkhuahkhirh chhunga kan tawrhna leh hrehawmnate hre reng chunga hetiang hun kan tawn nawn lohnan mi zawng zawngin mahni theihna zawn zawnah nasa lehzuala tan la thar theuh turin Mizoram mipuite an ngen a ni.

Vawiin meetingah hian COVID-19 vaccine dose 1,28,840 Mizoramin kan dawn tawh thu tarlan niin March ni 31, 2021 thleng khan mi 52,882 hnenah vaccine hi pek tawh a ni a, mi 12,018-in dose hnihna an la tawh a, vawiin atang hian India ram pumah kum 45 chin chunglamte tan pek tan a nih thu tarlan niin, Private Hospital atanga COVID-19 vaccine pe chhuak turin ruahmanna siam mek a nih thu tarlan a ni.

Mizorama COVID-19 positive hmuhchhuah tawh mi 4476 zingah kum 10 hnuai lam 192, kum 11-20 inkar 611, kum 21-30 inkar 1361, kum 31-40 inkar 1129, kum 41-50 inkar 651, kum 51-60 inkar 390, kum 61-70 in kar 98 leh kum 70 chunglam mi 44 an awm a. March thla chhung khan sample 20,856 (RT-PCR 1008, TrueNAT 108, RAgT 19740) test niin COVID-19 positive 52 hmuhchhuah a ni a. an zinga 27 hi travel history nei, Mizoram pawn atanga lo lut niin, positive contact atanga kai 10 an awm a, hri kaina chin la hriat loh mi 15 an awm bawk a ni. An zinga 19 hian symptom an nei a, mi 34 hian symptom an nei lo a ni.

Meetingah hian COVID-19 dona hmanrua chi hrang hrang kan neih mek dinhmun tarlan a ni a, tuna kan dinhmun atanga chhutin PPE thla li daih, N95 mask thla hnih daih, Three Layer Mask thla li daih, Gloves kum khat leh a chanve daih, Hand Sanitizer thla hnih daih, Sodium Hypochloride thla hnih daih, Viral Transport Medium (VTM) thla ruk daih, RAgT thla li daih a la awm thu tarlan a ni a. Kan dinhmun a chhe leh thut anih chuan COVID-19 second wave laka kan inven tlan theihnan uar tak leh ngawrh lehzuala mipuite hnena inzirtirna kalpui thar leh a tul thu sawi niin, a tul anga hmalak chhunzawm nghal a pawimawh thu tarlan a ni bawk.