No.5/2021-2022

Dated Serchhip, the 1st April, 2021: Vawiin hian Pu P. Jawahar, IAS, Chief Electoral Officer, Mizoram chuan bye election neihna tur 26-Serchhip ST AC a tlawh a, khaw pahniha election inbuatsaihna te a en bakah Serchhip DC Meeting Hall ah Election Nodal Officers te meeting a neih pui.

Chawhma lamah Chief Elector Officer hian 26-Serchhip ST AC chhunga rural area Polling Station awm chhun pahnih Neihloh leh Buangpui Polling Station te tlawhin inthlanna felfai a awm theih nan an inbuatsaih dan a en a, heng khaw pahniha inbuatsaihna te chu tha a tih thu leh lungawithlak a tih thu Pu P. Jawahar hian a sawi a ni. Neihloh leh Buangpuite a tlawh zawh hian Serchhip panin Serchhip DC Meeting Hall ah Election inbuatsaihna kal zela Nodal Officers te nen meeting an nei zui leh a ni.

Meeting ah hian Pu P. Jawahar chuan, vawiin thlenga Serchhip District Election Officer leh a hnuaia peng hrang hrangte inbuatsaihna chu tha tawk hle a a hriat thu sawiin, hmabak thawh tur la awm apiangte pawh felfai taka an kalpui zel ngei a beisei tih a sawi a. Inthlanna a zawh fel vek hma chu tumah kan inthlahdah thiang rih lo a ni, a ti. Inthlanna thianghlim leh felfai nei tur chuan election team hrang hrang leh Officer thawktute inpawhna tha a tul a, kawng khata thil fel lo a lo thlen palhin chu chuan thil dang a kangkai thei zel tih hre chungin kil hrang hranga hmalaknate inhrepawh tawn chunga hma kan lak zel a pawimawh hle a ni, a ti. Election Commission of India inkaihhruainate hi kan kal dan tur a ni tih hrerengin Officer ten kan mawhphurhna te hriat chian hle zel kan tum dawn nia, tiin Nodal Officer te hi a chah a ni. Tin, District Election Office, Chief Electoral Office leh Election Commission of India office te inthlunzawmna tha tak kan neih reng a pawimawh hle a ni, a ti bawk. In inbuatsaihna a tha tawk tih ka mitin a hmu a, tluang takin he inthlanna hi in kalpui thei ang tih ring chungin duhsakna ka hlan cheu a ni, a ti.

He hunah hian Pu Kumar Abhishek, IAS, DEO leh Returning Officer ni bawk chuan inthlanna atana inbuatsaihna enpui tura Chief Electoral Officer in a tlawh chu lawmawm a tih thu a sawi a, inbuatsaihna chu election puan a nih hma tawh atangin a theih ang angin bul an lo tan tawh tih sawiin, vawiin thlenga kalpui tawh chin leh hmabak la awm te chipchiar takin sawifiahna a nei a, Pu Lokesh Kumar, IAS, General Observer leh Pu Laxmi Kanth, IRS, Expenditure Observer te pawhin thusawina hun hmangin, thil pawimawh hrang hrang sawi hona neih a ni bawk.

Chief Electoral Officer hi Pu David L. Pachuau, MCS, Jt. Chief Electoral Officer leh Pu H. Lalrinpuia, MCS, Asst. Chief Electoral Officer ten an rawn tawiawm a ni.