No.3131/2019-2020
Nimin (17.3.2020) tlai khan Health & Family Welfare Minister Dr. R.Lalthangliana’n pisa-ah AMC Mayor leh AMC hnuaia Local Council hrang hrang hruaitute leh Central YMA Office Bearer te kawmin, tunlaia hrileng COVID-19 dona kawnga hmalakna tur hrang hrangte a sawipui a ni.

He hunah hian AMC kaltlangin Aizawl khawpui chhung hmun hrang hrangah COVID-19 dona atana mipui hriattur pawimawh hoarding hmanga tarlan nise tih a ni a, hei hi thla thum chhung a thlawn a tar nise an ti. State leh District level-ah Task Force din a nih tawh avangin Local/Village level Task Force din remtih a ni a, Local Council/Village Council kaihhruaina hnuaiah veng/khawtina NGO leh kohhrante telin din ni se an ti a, an kalphung tur inkaihhruaina Standard Operating Procedure pawh Planning Secretary Dr. Vanlalramsanga hmalakna in duan nghal ni se tih rel a ni a. Branch YMA chanchinbu zawng zawngah sawrkarin COVID-19 laka invenna atana tih tur leh tihloh tur a Health department-in inkaihhruaina a siamte tarlan ni se tih rel a ni bawk.

Hemi hma hian Health Minister hian a pisa ah tho Mizoram Government Doctors’ Association (MGDA) hruaitute leh Indian Medical Association (IMA) Mizoram Chapter hruaitute kawmin COVID-19 laka inveng tura inbuatsaihna te a sawipui a ni.

He sawihona ah hian Lengpui Airport leh screening point hrang hrang kaltlanga Mizorama rawn lut/lo haw te Aizawl an lo thlen hnu, a bik takin Aizawl atanga Mizoram hmun hrang hrang a kal darh leh turte Aizawla an cham chhunga lo ngaihven leh lo enkawl dan tur mumal taka neih a tul thu sawilan a ni a. Khualzin lo haw te pawh midangte ngaihtuah reng chunga mahni inkhunghran (self-quarantine) hrehlo tura ngen bakah mipuite faina kawnga uluk lehzuala tan la tura hrilh a, chil leh kuhva chhak mai mai lo tura inchah te a pawimawh thu sawi a ni.

Heng bakah hian Sawrkar damdawiin a bikin District Hospital leh Falkawn Referral Hospital te tun aia tha zawka inbuatsaih a ngai ni a an hriat thu leh PHC, CHC leh Home hrang hrangte inkaihhruaina dan mumal tak duan tha a an hriat thu an sawi a ni.