No.2673/2021-2022
Aizawl, 21st October, 2021 : Vawiin chawhnu khan Health Minister Dr. R. Lalthangliana hovin SAD Conference Hall, MINECO-ah COVID-19 dinhmun sawiho a ni a, he hunah hian MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo, DM&R Secretary Pu Vanlalngaihsaka, Health Secretary Pu R. Lalramnghaka bakah Aizawl bawrhsap, AMC, Health Department, DIPR, Home, ZMC hotute telin, IMA, MOT. MKHC, Jt. NGO Coordination Committee leh Aizawl City Local Council Association aiawhte an tel bawk a ni.

Vawiin meetingah hian Mizorama COVID-19 hri kai thar an tlem tial tial tan ta nia lang chu hmasawnna lawmawm tak a nih thu tarlan niin hetih rual hian inthlahdah mai a la hun lo tih sawi a ni a, mitinte tan tun hun hi fimkhur zual sauh sauh a tul rih lai a nih vangin theihtawp chhuaha mahni hmuna sawrkar SOP leh COVID Appropriate Behaviour zawm a ngaih thu sawi a ni.

Mask vuah tura inzirtirna beihpui thlak “All Mask Campaign” tun thla chhunga hman chhunzawm mek chungchang pawh sawiho niin hetih kawnga mawh la tura ruat ten an hmaklakna leh ruahmanna te an sawi a, hri kai thar kan tlem hret hret laia nunna chan an la pung zel chu vei awm a nih thu leh hetih kawnga nasa lehzuala tan lak dan turte sawiho a ni.

IDSP Nodal Officer Dr Pachuau Lalmalsawma chuan mobile RT-PCR Van sawrkar laipui atanga kan hawh dann tura hmalak a nih dan sawiin nikum kum laihawl atanga hmalak tawh tunn huna a hlawhtlinna kan hmu ta hi a lawmawm a ni a ti a. Mobile RT-PCR Van hi November thla laihawl velah Mizoram sawrkar kuta hlan hman beisei a nih thu sawiin kum khat kan hawh hnuah min pe chhunzawm nghal dawn a ni, a ti.

ZMC hotute report danin tunah hian ICU khum 44 an nei tawh a, reilteah ICU khum 5 dang peihfel inbeisei a ni. Vawiin chhun dar 12 a report ah ZMC COVID Ward-ah damlo 221 enkawl mek niin, anmahni awmpuitu COVID-19 positive ve tho mi 83 an awm bawk a, ICU ah mi 36 enkawl an ni bawk. ZMC a COVID-19 positive enkawl mek zinga dyalisis tih ngai mi 4 leh raipuar nau zai chhuah sak tur mi 6 an awm a ni. August thla khan ZMC a COVID-19 hri kai enkawl zingah nunna chan mi 59 awmin, September thlaah mi 63 an awm a, October ni 20 thleng khan nunna chan mi 59 an awm tawh thung a ni. October thlaa nunna chan zinga mi 42 (71%) hi kum 60 chung lam an ni a, vaccine full dose la nunna chan hi 27% niin, anni hi kum upa lam leh natna khirh tak nei sa an ni a, nunna chan zinga 45% hian vaccine an la lo a ni.

ZMC-a oxygen plant 3 – 200 LPM, 300 LPM leh 1000 LPM te tluang takin an hmang thei a, Path Company, USA ten US Dollar 52,000/- man Genome Sequencing Laboratory an rawn pek chu inpeihfel thawkhat tawh niin, ICMR pawhin phalna a rawn pe tawh a, a thawktute pawh training pek vek tawh niin October ni 27, 2021 hian hawng tura inpuahchah mek a ni. Hetiang laboratory hi India hmarchhakah chuan Dibrugarh ah chiah a awm a ni.

India ramah mipui vaibelchhe 100 in vaccine an la tawh a, Mizoramah chuan dose 11,89,163 pek chhuah tawh a ni a, 1st dose la hi 89.4% ni tawhin full dose la hi 71.7% an ni. Tar chak lo, damlo leh chhan hrangb hrang vanga vaccine pekna hmun pan theilote chu an inah kal chilhin vaccine pek ann ni a, first dose mi 572 hnenah pek tawh niin, full dose la mi 198 an awm tawh a, ID nei lo vaccine pek zat hi first dose mi 6199 leh full dose mi 503 an ni.