No.424/2021-2022

Aizawl, 6th May, 2021 : Vawiin khan Health Minister Dr. R. Lalthangliana hovin SAD Conference Hall, MINECO-ah COVID-19 dona kawnga inpuahchahna kal lai mek, a bik takin Covid Care Centre (CCC), Community Covid Care Centre (CCCC) ruahmanna siam lai mek thlirho a ni a. Meetingah hian MOT Chairman Dr. ZR Thiamsanga, MLA, Aizawl Mayor Pu Lalrinenga Sailo te an tel a, Mizoram Kohhran Hruaitute Committee (MKHC), Joint NGO Coordination Committee, Aizawl City Area Local Council leh Medical Operational Team on COVID-19 aiawhte bakah Health & Family Welfare, Tourism, PWD, PHE, PWD leh Finance department hotute an tel a ni.

Vawiin meetingah hian Medical Operational Team on COVID-19 (MOT) Chairman Dr. ZR Thiamsanga chuan Mizorama COVID-19 hripui leng mek dolet turin MOT chuan kan dinhmun uluk taka an zirchian hnuah rawtna chi hrang hrang sawrkarah an thlen tih sawiin, heng zingah hian sawrkar hnathawkte thawhlawm thawh tura sawm rawtna pawh a tel tih a sawi a. An rawtna thlen chi hrang hrangte sawrkarin a ngaih pawimawh saka, hma a laksak avangin lawmawm a tih thu a sawi. Dr. ZR Thiamsanga chuan MOT memberte hi Mizoram chhunga daktawr chi hrang hrang sawrkar hnuaia thawkte, Non-Government Hospital Association Mizoram aiawhte, private a practice daktawrte bakah daktawr pension tawhte an tel thu a sawi bawk a ni.

Vawiin meetingah hian COVID-19 positive, sawrkarin inenkawlna tur a buatsaih hmuna enkawlte chu Mizoram State Health Care Scheme (MSHCS) hnuaiah an inziaklut a nih chuan, he Scheme hnuaiah hian inenkawlna senso Rs. Nuai 2 thlengin an bill thei tih sawilan a ni a. Zoram Medical College-a oxygen hman man lak tura thupek awm chungchang pawh sawi chhuah niin, he thupek hi sawrkar hriatpui loha tih a nih vangin nimin khan thiah nghal a nih thu sawi a ni a. He thupek chhuah chungchanga mawhphurtu chu sawrkar hotute hriatpui loha thupek a chhuah chhan sawifiah tura hriattirna ‘show cause notice’ pek a nih thu tarlan a ni.

Mizoram chhunga COVID-19 hri kaite enkawlna tur hmun Covid Care Centre (CCC) leh Community Covid Care Centre (CCCC) dinhmun vawiin meetingah hian thlirho a ni a. Health department officialte report danin Aizawl district bikah tunah hian mi 873 awm theihna CCC 11 a awm thu leh nimin May ni 5, 2021 tlai dar 3:00 thleng khan COVID-19 hri kai 613 an awm mek a, Mizoram pumah mi 2045 dah theihna CCC 36 a awm thu leh nimin May ni 5, 2021 tlai dar 3:00 thleng khan COVID-19 hri kai 1069 an awm mek a ni. Aizawlah Paid CCC pahnih – mi 12 dah theihna State Guest House, Lily Veng leh mi 29 dah theihna Tourist Lodge, Chaltlang ruahman niin tunah hian COVID-19 hri kai mi 31 an awm mek a ni. Tnah hian Mizoram Rural Bank Office sak zawh hlim, MINECO ami chu Paid CCC atan ruahman tum mek a ni a, hemi atana ruahmanna leh tihfel ngaite lo zirchiang turin PWD, P&E leh PHE department hriattir an ni.

Khawtlang leh Kohhran enkawl Community Covid Care Centre (CCCC) Aizawlah 10 a awm mek a, kohhran leh khawtlang hotute nen tangrualin veng hrang hrangah CCCC awm theihna tur en thlithlai mek a ni a, CCCC atan hian a hmun neih ringawt bakah thildang ken tel a ngah avangin uluk taka ngaihtuah a tul thu sawi a ni a. Thingtlang lamah pawh hripui hi a darh tak zel avangin PHC awmna khaw hrang hrangte chu a tul veleha hman theih tur CCCC lo vauchher tura hriattir an nih tawh thu tarlan a ni bawk. Khum 150 awm theihna Dawrpui Presbyterian Kohhran Pastor bial enkawl Agape Camping Centre, Durtlang ami leh khum 80 dah theihna Synod Revival Camping Centre, Neihbawih ami te chu CCCC atana hmang tura Dawrpui Presbyterian Kohhran Pastor bial leh Synod hotuten an phalsak avanga lawmawm an tih thu tarlan niin, PHE department in tui harsatna chingfel tura hma an lak mek thu pawh tarlan a ni a. Aizawl Theological College-in Synod Revival Camping Centre, Neihbawiha hman tur mattress an thawh tur thu an sawi avangin lawmthu meeting hian a sawi bawk a ni.

Khum 63 awm theihna Central YMA enkawl Lawipui-a Girls Hostel pawh reilote-ah CCCC atana hman theih turin peihfel a nih tur thu meetingah hian tarlan a ni bawk a, CYMA te thahnemngaihna ah lawmthu an sawi bawk a ni.

Aizawl Municipal Corporation chuan CCC leh CCCC bakah Home Isolation-a awmte hnawmhnawk khawm chungchangah theihtawp an chhuah thu Aizawl Mayor Pu Lalrinenga Sailo chuan a sawi a, COVID-19 hripui dona kawngah AMC Councillor-te leh AMC hnuaia thawkte chuan theihtawp chhuaha ke pen an tum thu a sawi bawk a ni.

CCC, CCCC leh Home Isolation inkaihhruaina (SOP) duangtu Medical Operational Team on COVID-19 chuan vawiin lamah chuan an zawhfel theih tur thu an sawi a ni.

Health Minister Dr. R. Lalthangliana chuan COVID-19 hri kaite tha taka enkawl dam turin sawrkarin theihtawp a chhuah tih sawiin, kan dinhmun tawh a khirh mek laia kohhran, pawlho leh mimal ten Chief Minister’s Relief Fund a kan mihringpui he hripui vanga harsatna tawkte tanpuina tur leh he hripui leng laka kan him theihna tura sawrkar hmalakna tihchak nana sum an thawh thin chu ropui a tih thu a sawi a, hei hian hripui do tura kan tanrual zia a tilang chiang em em a ni, a ti.