No.3832/2021-2022
Aizawl, 27th January, 2022 : Health Minister Dr R. Lalthangliana hovin vawiin khan SAD Conference Hall, MINECO-ah COVID-19 hripui dona kal mek a thawktu healthcare frontline worker te leh hmanraw hrang hrang dinhmun sawiho a ni a, Health & Family Welfare Board Vice-Chairman Dr ZR Thiamsanga MLA, bakah DM&R leh Health & Family Welfare department hotute an tel a ni.

Meetingah hian COVID-19 hri kai kan pun chak leh tak avanga thawktu lama harsatna hrang hrang tawhte tarlan a ni a, volunteers 672 chhawr lai mekte thla hnih dang chhawr chhunzawm sawrkarah dil mek a nih rualin volunteers dang 173 dil belh nghal a nih thu tarlan a ni. Volunteers zingah hian daktawr, staff nurse, data entry operator leh Group D staff engemawzat an tel a ni. Mobile i-lab vil tur lab technician 5 vel mamawh belh a nih thu tarlan a ni a, sample lak tur a tam leh tak avang leh COVID-19 hri kaite enkawlna hmun a pun leh tak avanga thawktu lak belh leh vat chu a tul thu tarlan a ni.

Hrileng dona hmanraw hrang hrang dinhmun pawh thlirho a ni a, tun dinhmunah chuan hmanraw neih ten engemaw chen an la daih hlawm dawn angin lang mahse hmalam hun hriat a nih loh avanga a tul anga inlakkhawm a tul thu tarlan a ni a, PHC 61 behchhana CCC siam tura ruahmanna awmin a ken tel thil chi hrang hrang sawiho a ni bawk. Hmun hrang hrang atanga hripui dona hmanrua donation anga kan dawn te chuan nasa takin sawrkar phurrit a chhawk zangkhai tih tarlan niin lawmthu an sawi a ni.